نفسى أقولك حاجة! - مرسال لحبيبتى - القصقوصة التلاتة والتسعين

حبِيبْتِي .. حبيبتي
شرطه مايله
فرااااااغ
وهكتب ليه حروف إسمك ؟
ما هو إنتي في قلبي .. ساكنه القلب عارفه بقصتي وحالي
ومين غيرك في قلبي أكتب له مرسالي
.. أما بعد
مانيش عارف ده جوابي الكام
ماعونتش بحسب الصفحات ماعونتيش بحسب الأقلام
ماعونتش بحسب اللي ضاع من الأوهام .. كفايه إني بحبك بس
وقلبك لو بقلبي حس .. أو شاف حاله في بعادك
لصلي ربه وإستغفر لذنبه وصام
وياما في نفسي .. ياما ياما ياما ياما يامـــــــا
في نفسي .. تيجي لقلبي وتحني
ولازم تعرفي .. إني لا أنا عفريت ولا جني
بحبك بس إيدي أقصر كتير مني .. فمش هقدر أجيبلك من الدهب كفه
وأجيبلك من الياقوووووووووت كفة .. ومش هقدر أجيب الوالي في الزفة
ومش هقدر أجيبلك بيت يموت القطر لو لف في حماه لفه
كفايه إني بحبك مووووووت .. وحب الناس ندامه وعار وحبي عكسهم عفة
و لو ترضي فـ عندي شروط
أنا طبعاً بحبك موت .. ولكن بردو ليا شروط
أنا عايزك تكوني في الوريد دمه .. وتبقي في عقلي أنا همه
و تبقي ورد جوا القلب غيري يشوفوا يتحسر ولا يشمه
وعايز رمشك الجارح .. صراط يجرح فؤاد غيري مايرحمشي وأنا أجيلك
أعدي فوق صراط رمشك ولا أخافشي .. وحتي لو وقعت في يوم من الخبطة
أقع في عنيكي و أتوضي .. وأصلي ركعتين لله
وأبوس نن العنين .. وأمشي لأ أنا طماع ولا في طبعي الأنانية
جناين قلبي راح تفضل .. ولو طال البعاد فاتحه
بحبِـــــــــــك قولتها بالكسره .. نفسي أسمعها بقي بالفتحه

عارفة ناس كتير اوى دخلت وقالتلى ع التدوينة بتاعت امبارح انها مش وحشة ومش حلوة بس انا بكتب احسن من كده! اه انا عارف انها مش حلوة عشان انا معملتش فيها اى حاجة، انا حسيت فجأة انى عاوز اكتب وكتبت ومراجعتش اى حاجة كتبتها يمكن لو كنت راجعتها وفكرت اكتر وانا بكتبها يمكن كنت طلعتها أحسن من كده بالأسلوب المعتاد بتاعى، اصلك متعرفيش ان المقالة أصلاً طبخة زيها زى الصورة بالظبط .. يعنى عشان تطلعى صورة حلوة لازم تفكرى هتاخديها من انهم زاوية وبعد كده تبدأى تجهزى إضائتك او توظفى أضاءه المكان صح عشان تخدمك فى الصورة وبعد كده تلعبى حبه إيديت ع الصورة عشان تطلعيها حلوة اهو المقالة بقى كده بالظبط .. بتيجى الفوكيرة وبعد كده ابدأ اشوف هتناولها ازاى ومن انهم زاوية واقعد افتكس لغاية لما الاقيلها زاوية جديده محدش تناولها قبل كده وأبدأ أفكر تانى وتالت ورابع وبعد كده أبدأ اكتبها وعارفة أقل تدوينة بكتبها بتاخد منى تلت اربع ساعات .. احياناً بكتب سطرين واقعد أسرح فيهم وبقوم اجيب اكل واعمل شاى ونسكافية وكل الحاجات اللى انتى عارفاها دى .. وفى الاخر أقعد اقرا الموضوع مرتين تلاته وهوب ينتشر، اهو انا أمبارح بقى معملتش حاجة من دى خالص انا كتبت الموضوع وهوب اتنشر على طول، معملتش الطبخة تمام يعنى :D ألا صحيح بمناسبة الطبيخ، هوا انتى بتعرفى تطبخى ولا لأ ؟ :D .. شكلك مش بيعرف يطبخ .. مش مهم انا بعرف اطبخ حبه كده على قدى .. واهو أنا وانتى نتعلم الطبيخ مع بعض .. أحم، انا عارف انى مش هعرف اتعود على اكلك بسرعة عشان متعود على اكل ماما .. مش عاوز اقولك يمكن ماما مثلا ملحها فى الأكل زيادة او اقل بس خلاص بقى ملح ماما هو المعيار بتاعى فى الحكم على اى اكل بره يعنى اللى بيقل عن اكل ماما بعتبر اكله ناقص ملح واللى بيزود عن ملح ماما بعتبره مزود ملح :D .. بس مش تقلقى هبقى اقعدك مع ماما كتير عشان تبقى تظبطى الملح بتاع الاكل بتاعك :D

عارفة زى ما فى ناس كتير اوى قالولى على تدوينة أمبارح انها مش بحلاوة الحاجات اللى بكتبها على قد ما فى ناس برضه عجبتهم اوى .. عارفة ريهام؟ ممم مش عارفة ريهام، مش تقلقى هبقى اعرفك عليها مره .. ريهام بقى اول لما شافتنى النهاردة قالتلى حلوة اوى التدوينة بتاعت أمبارح وقالتلى بس طويلة اوى، البنت زمانها اتشلت وهيا بتقرا كل ده .. ألا هوا انتى قريتى التدوينة بتاعت امبارح دى اساساً ولا لسه؟ :D 

انا من النهاردة قررت انى كل فترة كده اكتبلك جواب، اه جواب وهحطه فى ظرف كبير اوى واقعد اجمع فى الجوابات كلها مرة واحده وابقى اديهملك فى يوم ما واقعد انا وانتى نقراهم ونضحك .. بس أنا مبسوط النهاردة وهنزل اخرج كمان شوية واروح اقعد مع العيال صحابى رفقاء البُئس فى الحب فى الجُنينة اللى قدام المحافظة ونشترى فل من الراجل تانى ونقعد نغنى تانى ونعلى صوتنا زى ما عملنا من كام يوم ونقعد نصور نفسنا واحنا فى حال انبساط كامل وهتكلم عليكى النهاردة وكل واحد هيتكلم برضه، اصلك متعرفيش أن احنا مش بنضم المستمعين للمجموعة بتاعنا، لع لازمن يكون عندك قصة وفيها أكشن عشان يخش معانا .. كل واحد فينا بيحكى ونقعد نخطط كلنا مع بعض ونشوف هنعمل أيه .. عارفه بنفرح اوى لما حد فينا تبقى اموره مستقره او يكون خلاص بيظبط الدنيا عشان يخطب .. اه يخطب مهى المشكله انهم كلهم أكبر منى :D بس عادى مهو انا كمان سنتين تلاته هبقى كبير كده زيهم وهاجى اقولك انى عاوز اخطبك :D

عارفة أيه الحاجة اللى كان نفسى اقولهالك اوى؟! نفسى تخليكى حلوة كده من جوه زى ما انتى مهما حصل، ممكن بقى؟!