Un Journaliste

علاء عبد الهادى مات - وكأنى عصفور مدلع آه متلوع!

2011-12-19T14:27:00.000+02:00

وكأنى عصفور مدلع آه متلوع ..
وفى قلبة حكايات بتولع ..
راح أغنى، ولازمنى ادفى وابعد حزنى ..
ولكنى بحس اكمنى عاشق لزمان اللى تاعبنى آه تاعبنى ..
لو هقدر أغير راح أغير، لو مش قادر أنا لازم اغير واتغير ..
ولأن محدش كلمنى، أنا بمشى على شاطىء حزنى ..
وكأن العالم .. مش ملكى

بالتأكيد شاهد الكثير منا المؤتمر الصحفى لللواء عادل عمارة وربما تعاطف الكثيرين مع تلك الصورة للمجند الذى أصيب فى ساقه نتيجة آله قطع حادة كما وصف اللواء عمارة، طالب اللواء عمارة إعادة تلك اللقطة اكثر من مرة واصفاً تلك المعاملة القاسية لذلك المجند الذى يُغطى الدم ساقه نتيجه قطع بآله حاده أصاب قدمه قد يُصاب به أى منا لو كان عارى الساقين واصطدم بأى رفر عربية حديد!، نسى اللواء ان هناك أشخاص فقدوا ارواحهم من اجل فكرة امنوا بها!

بالتأكيد علاء كان فى إمكانه التحويل إلى طب طنطا بعد مرور عام على وجوده فى طب عين شمس ولكنه ربما فضل طب عين شمس لأن خريج طب عين شمس له أفضليه .. او ربما هو أراد الخروج والعيش فى القاهرة والأحتكاك بشريحة أكبر .. ربما اراد ان تكون حركته سهله فى التواجد فى ساقية الصاوى لحضور بعد الحفلات والأنشطه المختلفه .. ربما أراد ان يكون من السهل له حضور حفلات عمر خيرت فى الاوبرا أن كان يعيش ويدرس فى القاهرة ..

بالتأكيد كان علاء يلعب دور الطبيب المعالج والمستشار الطبى لأى شخص يمرض فى عائلته، انتم بالتأكيد طالب الطب حينما يُصبح دكتوراً بمجرد ظهور نتيجة التنسيق ودخوله كليه الطب .. بالتأكيد فرحت والدته به فرحاً شديداً بمجموعه العالى وبمجرد ظهور التنسيق سارعت بشراء البالطو الابيض له واصبح لقبه الدائم " دكتور علاء راح ودكتور علاء جه " .. وبالتأكيد كلما اشتكت والدته من شىء كانت تُسارع بقول " لا لا مش هاخد حاجه إلا لما اسأل الدكتور علاء " ..

هل كان علاء يرغب فى دخول كلية الطب؟! ربما لا .. ربما كان يفضل دراسة السياسة والأقتصاد بل ربما كان يرغب فى دخول المجال الهندسى .. ربما جاء على نفسه ودخل كلية الطب لأن حلم والدته كان متمثلاً فى كلية الطب والتى يُصنفها الكثيرين انها من كليات القمة ..

هل قابل علاء أصدقاء يوم الخميس قبل ان يُستشهد يوم الجمعه؟! انا لا اعلم الحقيقة .. ربما كان يمتلك الكثير من الامتحانات فلم يسعفه الوقت لكى يقابل أصدقائه ليله الخميس .. او ربما هو قد قابلهم وقاموا جميعاً بالذهاب إلى ميدان التحرير وإعتصام مجلس الوزراء ..

ربما قد كان يفكر علاء صباح الجمعة ان يهاتف صديقة ويعتذر له ويعيدان علاقتهما كما كانا قديماً .. ربما أخذ بينه وبين نفسه يسترجع تلك الذكريات الجميلة التى مرا بها كلاهما واخذ قراراً أن يهاتفه ويتفقان على موعد ليتقابلا فيه .. ربما كان علاء قد هاتفه بالفعل واتفقا على المكان والزمان ..

ربما كان علاء يُحب زميلته بالكلية .. ربما كان يراها علاء أجمل شىء فى ذلك الكون .. هل اخبرها علاء بحبه؟! لا اعرف .. هل كان علاء يمارس ذلك الحب الأفلاطونى ويحبها فى صمت خوفاً من الرفض من قبلها؟! مازلت لا أعلم .. هل كان علاء يرغب حقاً فى التقدم لخطبتها فى اجازة الصيف القادم مثلما يفعل الكثير من طلبة الطب بإعلان الخطبة فى بداية سنه سته؟! مازلت لا اعلم .. هل فاتحها علاء فى الموضوع؟! .. ربما كانت هى الاخرى تُحبه وتعلم بحبه الصامت وكانت تراه رائعاً بإلتزامه وعدم مفاتحتها فى الامر إلا فى حالة الجدية والرسمية من طرفه .. ربما هى الأن منهارة لأنها فقدته .. أو ربما هى كانت تراه غير مناسب .. ربما ظنت انه ثورى أكثر من اللازم .. ربما كانت تعتقد ان شخصيته لا تتناسب مع شخصيتها ..

قد تكون والدته طلبت منه عدم الذهاب إلى الميدان .. بل ربما هاتفته حبيبته صباح الجمعة وطلبت منه ألا يذهب .. ولكنه خالفهم جميعاً

ربما كان علاء يُخطط ان ينتهى من دراسه الطب ويبدأ بالاتجاه إلى مجال اخر يحبه ..

عزيزى المجلس العسكرى .. لقد كان علاء فكرة، فكرة جامحة تتحرك على قدمين .. فكرة كانت تمتلك احلاماً وطموحات .. فكرة أصبحت الأن مجرد ذكرى وفقط، ومازلت تتسائل لماذا نهتف " يسقط يسقط حكم العسكر " ؟!

زعق وقول اللى جواك! - قصاقيص ورق

2011-12-16T17:43:00.001+02:00

تنويه :- لا تسألنى لماذا عُدت إلى ذلك المكان وقد كُنت بدأت أبغضه!، فقط طلب احدهم منى ان اعود وقد عدت هكذا هو الامر ببساطة!

أنا الواد بتاع المزيكا، ماسك جيتارى الانتيكة!
وبغنى ليا وليكَ!
حبيت انا، وانا عارف ان الامل ضعيف!
العيشة صعبة والحالة كرب!
واللى فى الجيب خفيف!
ولا شقة ولا عربية،ولا مهر ولا مهيه!
بس اللى شوفته فى الحياه، ممكن اغنيه فى أغنية!
دخلت انا م الباب، نطيت دوغرى م الشباك!
قولتلها يا طنط اسمعينى، انا نفسى اكمل نُص دينى!
قالتلى يا بتاع المزيكا، روح لأمك وأبيك!
غلطان انا م البداية، ومحلتيش غير غُنايا!

ظن سامح ان تلك الصورة تُعبر عن مشاعرى تجاه مصر!، نعم مصر؟! لم اتفهم ابدا ً كيف فسرها بذلك المنظور؟! ولكن الجميع اجمعوا على ان فكرة الصورة جيده جداً واننى فاجر! أيوالله، اخبرنى الكثيرين اننى كُنت فاجراً فى تلك الصورة! ولكن حقيقة الامر اننى لم اكن فاجراً ولا نيلة بل على العكس لقد طلعت عين صديقى العزيز رجائى ونحن نصور تلك الصورة!

فى كل مره يعود فيها رجائى من الأسكندرية يجب ان نجتمع عنده لممارسه طقوس الهلس والإبداع معاً! لا تسألنى كيف يجتمع الهلس مع الإبداع ولكننا قادرين دوماً على صناعة ذلك المزيج السحرى من الهلس الإبداعى!

تستقبلنى دوماً امنية _ اخت رجائى _ بالبيبسى! نعم، ان البيبسى فى ذلك المنزل يجب ان تقرنه امنية بتذكيرها إياى بالثورة واننى كُنت دوماً اسطو على مخزون البيبسى لأشربه بدلاً من ان اضعه على وجهى حينما استنشق الغاز المسيل للدموع!

بمجرد ان دخلت حجرة رجائى، حتى اخبرته بان هناك فوكيرة صورة جت فى بالى وانا فى السكة وعاوز اعملها .. هكذا نبدأ فى تجهيز الحجرة وتحديد الوضعية والبحث عن الورقة التى سنكتب عليها الكلمات وعن اللزق الذى سيوضع على فم العبد لله! وبقيت المشكلة التى ارهقتنا فى التصوير!، عيناى، نعم كانت نظره عينى تحدى صعباً فى تلك الصورة! لم استطع ابداً ان ابين أى أحساس فى عينى غير إحساس " القسوة "! نعم القسوة! فى كل مرة كان يخبرنى فيها رجائى ان نظره عينى تخبرها بكل بساطة " أنا عاوز اقتلك " كُنت اضحك بداخلى!، حاولت مراراً وتكراراً ان أُظهر مدى حنينى ولهفتى ولكنى فشلت! اخبرنى حينها رجائى ان اركز كل تفكيرى فيها واخبر نفسى مراراً وتكراراً " انا هحبك من سكات عشان انا تعبت! " لتخرج نظرات عينى فى النهاية كما بالصورة!، اتمنى حقاً أن يكون التعبير الموجود فى الصورة صادق!

فى كل مرة اجتمع مع سامح وسالى يُصران كلاهما على ان حبى أفلاطونى ويعاجلنى سامح دوماً بان حبى مثالى بطريقة مُرعبة! ثم يستفيض دوماً سامح ليخبر من يجلسون معنا إن كان هُناك احد معنا! ان مثالية الحب عندى وصلت لدرجة انك تخشى على مشاعرها فلا تخبرها بمشاعرك! ثم يبدأ فاصل الضحك حينما يُخبرنى دوماً ان الحب هو عبارة عن علاقة ثنائية وليس علاقة فردية كما اعتقد دوماً! تُخبرنى سالى انها متفائلة، كذلك سامح .. اما انا فلا!

لم اتفهم حقيقة ان ينتظر البعض منى ان ادلو بدلوى انا الاخر فى كل تلك الاحداث السياسية التى تحدث حولنا وان اكتب نوت طويلة عريضة لأحلل انا الاخر كل تلك الاحداث التى تحدث من حولى! يذكرنى هذا بشخص ما فى كل مرة أقرأ له أستشعر ان يظن نفسه فهمى هويدى فلا يمر اى حدث حتى اجده يكتب نوتاً على الفيس بوك وكأنه بياناً صحفياً يشرح فيه رأيه الشخصى فى تلك الأحداث! وكأن الامر يحتاج إلى تفسيرات! ليتوقف كل منا عن لعب ذلك الدور التحليلى الرائع ..

" أشتريلها بوكية ورد احمر " .. كانت تلك الجملة صادمة بالنسبة لى حينما طلبت مشورة صديقة فى هدية ما!، اخبرتنى ان ابتاع لها بوكية ورد احمر واسيبهولها قدام باب الشقة! .. حلول صديقتى تلك دوماً بسيطة وسهلة، هى تأخذ دوماً الحياه ببساطة وسهولة وكأننى سأجد فى نفسى الجرأة التى تجعلنى أنزل لمحل الورد واتحمل نظرات البائع السخيفة إلى وهو يضحك ضحكة صفراء وانا أطلب منه بوكيه ورد احمر! ثم قمة المهزلة ان أسير فى الشارع حاملاً بوكية ورد احمر! دعك من اصعد إلى منزلهم واضع البوكية على باب الشقة! طب ولو انا معرفش هما ساكنين فين اعمل أيه؟! .. ورد احمر؟! أل ورد احمر أل؟! هوا احنا بتوع الكلام ده برضه؟!

الموضوع طلع معقد اوى! اكيد بتكلم عن الجواز!، فمثلاً كُنت اظن ان الموضوع حباله طويله! احم طويله اوى! وبالطبع الامر عكس ذلك تماماً وكلياً وفعلياً ومهلبياً .. مثلاً كُنت اظن ان الــ Date expired بتاع قراية الفاتحه بيخلص بعد سنة! اتارى قراية الفاتحة دى اخرها بتاع تلت أسابيع شهر بكتيره!، ثم انا مثلا ً كُنت مفكر ان " تلبيس الدبل " ده خطوه لوحدها! اتاريها خطوة مزدوجة مع " الشبكة "! دعك من تلك الامور يجب ان تنتهى فى حد اقصاه عامين لا اكثر!

" احمد، خلص السنة دى واشطه يعنى انتا حد كويس ومستقبلك كويس .. نباركلك بعد النتيجة وتخلى طنط تكلم مامتها وتظهر ع الساحة بقوة! " .. صدقنى انت لست بحاجة إلى كثير من الذكاء حتى تستنج ان صديقتى صاحبة إقتراح الورد هى نفسها صاحبة هذا الإقتراح!

بينى وبين نفسى قررت اخيراً أن أنهى تلك المرحلة البشعة من الحب الأفلاطونى والحب الصامت والحب البتنجانى ذلك، الخطوة القادمة هى ان تتقدم رسمياً لأحداهن وتلقى الرفض!

كُنت انا وهو نتناقش سوياً حول جدوى " الخوف " .. تناقشنا كثيراً وضربنا امثلة اكثر! لقد ضيعنا على انفسنا فرصاً كثيرة فقط لأن الخوف اصابنا من ان نحاول، فقط نحاول .. على الرغم من اننا لو حاولنا ربما حصلنا على أشياء حلوة كثيرة! ولكنه الخوف .. الخوف من المحاولة الذى يُضيع علينا الفرص!

فيروز - قصاقيص ورق

2011-10-13T15:08:00.001+02:00

أنها مملكة من القناديل المضيئة مع سكون خافت مع موسيقى هادئة تنبعث من مكان ما لا احد يعرف أين هو وشعور نفسى رائع بالسلام الداخلى!، مرحباً بك فى مملكة فيروز.

تمت! - القصقوصة الأخيرة

2011-08-30T01:13:00.000+02:00

وخلصت الحواديت كلها مرة واحدة، من الاخر يعنى ممكن نحط كلنا " تمت " بقلب مستريح :)

الصرصار! - قصة قصيرة فاشلة

2011-08-26T18:23:00.002+02:00

تنويه : الامر واضح هذه المرة! لا علاقة بين احداث القصة ومثيلتها على أرض الواقع!، والكاتب يُحذر أى شخص من ربط أحداث القصة بالواقع!

كان يجلس منكس الرأس على ناصية ذلك الشارع يحمل فى يديه ذلك الموبيل ممارساً عليه لعبة الطيور الحانقة ( angry birds ) مستمتعاً بكل تلك الأشياء الفاشلة الذى يمارسها مؤخراً .. اخذ يسأل نفسه وهو يمارس اللعبة ويتخطى ذلك المستوى الصعب " هو ليه كل مره رمضان بيحصل فيه كل العك؟! " أخذ يفكر جاهداً كيف يعبر ذلك المستوى الصعب الذى لم يتخطاه أى من أصدقائه! وفطن إلى اجابة سؤاله فجأة " مهو يا حيوان عشان علاقتك بربنا زى الزفت فالعك كله بيحصل فى رمضان لعلك تتعظ! " .. نظر إلى المستوى وإلى كل تلك الطيور الحانقة فى اللعبة وفطن انه لن يستطيع تجاوز ذلك المستوى وحده! ووضع هاتفه جانباً واخذ ينظر إلى الأسفلت بمراره شديدة! ولمح ذلك الكائن الصغير الذى يحاول عبور الشارع أنه ذلك الكائن الشاعرى " الصرصار " ذلك الكائن الذى يخشاه الكثيرين، ذلك الكائن الذى ربما افلت بمعجزة ما من أرجل الكثيرين .. ها هو يراه الان امامه يحاول تجاوز ذلك الشارع متحدياً كل تلك السيارات! استمر فى مراقبته عشر دقائق كاملة توقع فيها ان تنتهى حياته فى أى لحظة ولكنه عبر الشارع متحدياً عجلات السيارات وأرجل المارة! عبر ليقف أمام ذلك الرصيف، تحديداً امام ذلك العملاق الجالس على ذلك الرصيف!

وقف الصرصار امامه لدرجه اربكت صاحبنا هذا! لدرجة شعر معها ان الصرصار هو الكائن المسيطر وهو العملاق هنا! لماذا لم يتحرك ذلك الكائن الضعيف من امامه؟! أخذ يُحدق فى ذلك الشىء الصغير ويسترجع حياته امامه، لم يدرى ما هو الرابط بين ذلك الصرصار وبين حياته؟! ولكنه قام فجأه وبطرف قدمه سحق ذلك الكائن دون رحمه! وحينما شعر بتانيب ضميره فى انهاء حياه صرصار بذل مجهوداً خُرافياً فى تجاوز الطريق! نظر إلى نفسه واخبرها " هذا ما كان سيحدث إن كُنت انا الصغير وهو العملاق كان سيسحقنى هو أيضاً! " وهكذا استمتع بتبرير فعلته المريضه وانتصبت قامته وواصل السير فى ذلك الشارع الطويل! مواصلاً حياته البائسة!

الحكاية! - القصقوصة اللى قبل الأخيرة

2011-08-19T23:42:00.000+02:00

شوفتك، لمحتك غصب عنى ..
وكتبتلك وقولت أغنى ..
واتخيلت ان انت جنبى ..

بعد ما جريت بينا الأيام ..
واكون انا وانت فى وسط العيال ..
مش كنت تقول انك معايا؟!
وكنا نعيش الحكاية؟!
والحلم، يبقى حقيقة!
شوفتك وقولت، ده حلم اكيد ..
وكنت فاكر أن انا الوحيد ..
واقف قدامك وبشوف من بعيد ..
ومجاش على بالى ان انت كمان ..
واقف بتفكر فى نفس الكلام ..
مش كنت تقول انك معايا؟!
وكنا نعيش الحكاية؟!
والحلم، يبقى حقيقة!
دلوقتى بفكر أزاى ارجع تانى؟!
أرجع، لو يوم او حتى ثوانى ..
واقولك كلمة هتغير أيامى ..
وترد عليا، واعيش من تانى ..
مش كنت تقول أنك معايا؟!
وكنا نعيش الحكاية؟!
الــــحــــكــــايــــة

تعرفى؟! انا مش هقولك أكتر من انى بحبك بعدد حروف القرآن!

وشوش الناس! - قصاقيص ملهاش لازمة

2011-08-14T19:44:00.002+02:00

For High Quality of image Click Here

فى بعض الأحيان يُطلب منا ان نرتدى الأقنعة على وشوشنا من اجل الكثير من تلك الأشياء الدنيوية المادية! احم، شكلى هتفلسف أو تحديداً انا اتفلسفت فى الجملة اللى فاتت دى .. أنا تقريباً مش فاهم انا قصدى ايه بالجملة اللى كتبتها فى الاول دى!

لم تتفهم أبداً لماذا دوماً تطفىء الانوار وتشعل اعواد البخور وتستمع إلى موسيقى وصوت فيروز وتبكى كلما فقدت علاقة انسانية بأحدهم! .. لا أريد أن اكون معقداً او متعالياً ولكن من الصعب على حقاً ان أضع شخصاً ما فى مصاف علاقاتى الانسانية بسهولة! دعك من ان القدر يُلقى دوماً فى طريقك بالكثير من العلاقات الانسانية الرائعة ..

والقاعدة ها هنا هو انه مقابل كل عشر علاقات انسانية تفقدها ربما قد تكتسب واحده اخرى! بأختصار .. علاقتك الانسانية بأى بشرى طبيعى هى كنز لأنه من الصعب أن توجدها مرة اخرى!

سألتنى صديقة ذات يوم " احمد، هوا انتا عمرك ما خدت قرار انك تبطل انتا اللى تسأل وتشوف الناس هيا اللى هتسأل عليك زى ما انتا مهتم ولا لأ؟! " اخبرتها ببساطة أن الجميع ينشغل فى حياته، هذه هى سنه الحياه، انا نفسى بتمر على شهور دون ان أسأل على احدهم ولكنى فقط أحاول جاهداً ان اسأل على الجميع واهتم بالتفاصيل وكل تلك الأشياء فقط لمحاولة الإبقاء على تلك العلاقات الانسانية اطول فتره ممكنة، بالإضافة إلى اننى اكتشفت اننى انا من يشعر بالسعادة لوجود بعض الأشخاص حوله وبالتالى فأنا المطالب دوما بالسؤال عليهم لانهم هم من يُشعرونى بالسعادة فى الكثير من الأحيان!

أغبى شىء لا استطيع التخلص منه هو شعورى باننى مسئول عن كل من اعرفهم! شعور غبى يصل فى بعض الاحيان ان تُصبح حياتك هى حياه الاخرين حتى تستطيع تبسيط المشاكل والهموم لديهم! تكمن المشكلة انك حينها تُصبح محملاً بكل تلك الاشياء بالإضافة إلى مشاكلك انت الشخصية!

لم استطع يوماً ان امنع ضحكة السخرية ونظرات التشفى التى تظهر دوماً على وجهى حينما أنصح احدهم يوماً بشىء ولا يعرنى انتباه ويتصادف أن ما حذرت منه يحدث له! يقولون انك فى تلك اللحظات يجب ان تقف بجواره لكى يتجاوز تلك الأزمه اما انا فاعترف اننى لم استطع يوماً ذلك! انا فقط أقف وانظر واتشفى! .. خاصة أنك تكون قد بذلت مجهود خرافى فى محاولة لإقناعة وتوعية وضرب الامثلة بل انك فى كثير من الأحيان تتنازل عن ذلك الجزء غير المعلن من خصوصيتك وتخبره إياه لعله يتعظ من خطأك ولكنهم دوماً يصرون على ما يفعلون معتبرين إياك مغرور وبتتنطط عليهم! إذا ها انا اخبركم للمرة الألف بعد المليون " فاكس بشر! "

انسان! - القصقوصة التلاتة وسبعين

2011-08-03T04:13:00.005+02:00

ياما نفسى اعيش إنسان قلبه على كفه
كل اللي بردانين فى كفوفه يدفوا
يضحك يُضحك خلق الله
يفرح يُفرح كله معاه

وفى عز المعمعة واللغبطة اللى الواحد فيها، وبعد ما كان الواحد عنده احلام وطموحات ونفسه يعمل ويسوى ويروح ويجى .. فجأة كله اتبخر وبقى أقصى طموح للواحد دلوقتى انه يقلع كل أقنعة الحزن والفرح المزيفة اللى لابسها ويبقى مجرد انسان .. انسان بجد.

بقيت حاوى! - القصقوصة المية بعد العشر تلاف

2011-08-01T13:25:00.009+02:00

"Amy Zack Photography"

بقيت حاوى .. بقيت غاوى فى عز الجرح أنا مابكيش
بقيت عارف .. أطلع من ضلوع الفقر لقمة عيش
بقيت قادر .. أدارى الدمعة جوايا مابينهاش
بقيت راضى .. أنام رجليا مقلوبة كما الخفاش
أنا إتعودت أحلامى أشوفها بتجري قدامى وملحقهاش

عارفة أحياناً كتير اوى بفكر انى ارجع بشريط حياتى وامسح منها كام حد كده وكام موقف كده بس عمرى ما هعرف اعمل كده .. بس فى شخص بجد على الرغم انه خلاص بح يعنى بس سببلى الأذيه كتير أوى .. يمكن هاخده شماعة وارمى عليه حاجات كتير دلوقتى بس على أقل تقدير الحد ده كان سبب أساسى عشان الدنيا تتبهدل معايا اوى كده، هاهاهاهاها كنت ماشى بمدأ أن الحب هو اللى ليه الاولوية .. خسرت صُحابى وخسرت ثقتهم عشان الحد ده .. هاهاهاهاهاها، مستغربه انى بضحك؟! لأ فكك من حوارات أن الدنيا بقت تمام وبتاع .. محدش كان تمام من الاول أصلا ً بس أشطه أهى مضلمه كحل اهى ومش بينلها نور .. المهم عارفه غير كده إيه؟! خسرت نفسى! وعمال بدور على نفسى والمصيبة كمان أنى اكتشفت أنى عمال ماشى فى دايرة بلف فيها بقالى كام سنة ومكنتش عارف! تخيلى لما تبقى مفكرة نفسك ماشية فى طريق طويل مستقيم وكل يوم مفكرة انك بتتقدمى خطوة وبتسبقى غيرك وبتنجحى وبعد كام سنة تلاقى نفسك شايفة خط النهاية وعمالة تجرى وترهقى نفسك عشان توصلى أول واحدة وهوب لما توصلى تكتشفى انك لفيتى ورجعتى تانى لخط البداية ومطلوب منك انك تبدأى تانى وترهقى نفسك وتشتغلى وتجرى عشان توصلى خط النهاية مع العلم ان المرة دى كله سابقك وهدفك هوا انك توصلى اصلا ً مش انك توصلى الاول! فاهمه حاجه من الكلام اللى فوق ده؟! لع، طيب ولا أنا برضه!

أبويا بدل ما يخش عليا بكيس فاكهة ولا حاجة، لقيته داخل عليا بعلبة فيتامينات مش عارف أيه ومستخلصه من اجود انواع مش عارف ايه وبتساعد ع التركيز وصفاء الذهن عشان انا بقى شكلى يصعب على الكلب! وكان عليها صوره كده مش مريحانى لدرجة انى بدأت اقلب فى العلبة وادور على جملة " لحياة زوجية سعيدة! " بس مش لقيتها ولما أبويا حس بشكوكى دى قالى " يا ابنى شغل شركات أدوية عشان تبيع! " .. تعرفى أبويا دخل صيدلة بمزاجه وكان هوا الوحيد وسط صحابه اللى دخل صيدلة والباقين دخلوا طب .. أبويا بيقعد يحكيلى ازاى انه كان بيذاكر ويشتغل فى الأرض مع أبوه زمان وازاى كانوا عاوزين يخلوه يطلع بعد الأعدادية بس هوا اللى مرضاش وذاكر .. ابويا لسه معاه ورقه الجرنان اللى مكتوب فيها اسمه وهو تالت جمهورية! وكل واحد فينا بيبقى نفسه يطلع احسن من أبوه .. هأأأأأأأأأو، غلبتنى يا حج عادل!

بقالى كتير مش قعدت مع العيلة على اكله! ما انتى عارفة انى بتصعلك فى الشوارع ليل نهار يا بصور حاجة يا بقابل حد! مش بحب انا البيت وبحب انزل اتمشى حتى لو لوحدى بس مش بحب أقعد فى البيت! بس كنت مبسوط اوى واحنا ملمومين ع السحور فى اول يوم رمضان .. عمالين نضحك ونهزر والجو كان جميل اوى والاكل كان حلو، عارفة بجد اللمة بتحلى مع رمضان .. رمضانك كريم :)

هجيبلك تكيف على فكرة! - القصقوصة الخمسة وسبعين

2011-07-28T20:43:00.004+02:00

You're beautiful. You're beautiful.
You're beautiful, it's true.
I saw your face in a crowded place,
And I don't know what to do,
'Cause I'll never be with you.

فاكرة امبارح لما قولتلك انى هسيبك دلوقتى عشان أروح قدام المحافظة اقابل صحابى ونهيس؟! انا بقى عارف ان الفضول هيقتلك عشان تعرفى احنا بنعمل أيه هناك .. بُصى يا ستى بروح انا وجلجل وعز نقعد فى الجونينة اللى فى النص اللى قدام المحافظة ونشترى بيبسى ونقعد نغنى ومرة اتهبلت وروحت أشتريت فل من الراجل اللى واقف فى الأشارة بتاعت شارع النحاس :D ومش عارف ليه الراجل كان مبسوط اوى وانا بشترى منه، ما علينا يعنى! المهم احنا بقى بنقعد نغنى ونضحك ونقعد نشتم فيكم :D اه ايوه فيكم انتم البنات :D أصل تقريبا ً كل البنانيت لازم يطلعوا عين اللى جابونا كده :D .. بس انتى عارفة انى لما بدعى عليكى بيبقى والله من ورا قلبى، أكيد انتى عارفه انى بدعيلك اكتر ما بدعى لنفسى :D

على فكرة أنا هحكيلك على كل حاجة عملتها قبل ما أحبك، هقولك انى قولت لفلانة انى بحبها وهقولك برضه انى حبيت فلانة وعلانة قبلك .. أه صحيح خليكى متعودة انى ممكن انا وانتى واحنا ماشين فى الشارع مرة اجبلك فل :D .. انا اتجننت يوم لما كنا قاعدين قدام المحافظة ورحت اشتريت فل لنفسى بس عارفة انا بعد كده مش هشترى فل تانى إلا لما تبقى معايا بقى وكده :D

عارفة بحب اوى الناس لما تتجنن معايا على حاجة مجنونة انا عملتها زى الفل كده :D، مرة كنت عاوز عادل ومشرف فخدتهم وروحنا قعدنا على قهوة الاحمدية اللى عند السيد البدوى ما انتى عارفة انى بحب الجو القديم ده اوى وعارفه واحنا ماشين قابلنا الرجال بتاع غزل البنات،وكان بقالى فترة عاوز اتجنن واجيب اكل فى الشارع وكنت مبسوط يومها اوى وروحت اشتريت من الراجل أكياس كتير وقعدنا ناكلهم احنا التلاتة وهما عمالين يضحكوا وانا مبسوط :D .. فكرينى ابقى اخدك اقعدك هناك مرة وابقى اشتريلك غزل البنات ..

هههههه، بمناسبة الواد مشرف صحيح! كنت النهاردة مروح انا وهو وكان معانا شريف وزى ما انتى شايفه احنا اخر الشهر :D وبصراحة انا مش عارف لغاية دلوقتى انا عديت الشهر ده أزاى من غير ما اخد من ماما او بابا فلوس :D صلحت اللاب بـ 250 جنيه وسافرت اسكندرية قعدتلى تلت تيام صرفت مبلغ قريب من ده :D .. ده غير كل يومين تلاته سفر القاهرة ده غير انى اصلا مش مقيم فى بيتنا واحسبى بقى البيبسى والاكل من بره :D النهاردة بقى واحنا مروحين كان فعلا ً خلاص بح كان فى جيبى اخر جنيه المفروض أقضى بيه اخر الشهر وانتى عارفة بقالى فترة مش بحب اخد فلوس زيادة بحاول اكيف نفسى ع اللى معايا وخلاص عشان بعد كده لما اتخرج واخد مرتب اعرف امشى امورى :D .. المهم بقى أكتشفت أن احنا التلاتة على بعض كان معانا 13 جنيه :D اه والنعمه تلت شُحطة معاهم 13 جنيه بس لأ وأيه قرروا ياكلوا بره بالمبلغ الجبار ده :D .. المهم صرفنا نفسنا وطبعا قعدنا نتحايل على مشرف انه يعزمنا على البيبسى والراجل وافق فى الأخر :D بس عارفة ده بيحط الواحد فى سؤال بشع، الا هوا انا هعرف اتجوز اصلاً بمرتبى :D .. اصلى اكتشفت فجأه ان بيبقى فى فواتير تليفون وكهربا وميه وحاجات كتير كده مكنتش واخد بالى منها :D من الاخر الجواز طلع مسئولية مادية :D مممم، ياترى هتبدأى معايا زى ما كانت الناس بتبدأ واحدة واحدة زمان :D ولا السيد الوالد هيقولى الشقة لازم تكون جاهزة وعربيتك معاك وحسابك فى البنك مليان :D بس عارفة انا عارف ان بابا راجل طيب ومحترم ومش هيبص للحاجات دى :D اكيد اكيد هيبقى يجبلنا التكيف هدية :D .. بس عارفة ماما دايما ً بتقعد تقولى انت الشقة موجودة خلص انت بس واظبط مرتبك واتكل على الله :D ثم انتى عارفة احنا هنقعد مخطوبين سنتين عقبال ما اجهز الشقة :D بس والنبى واحدة واحده عليا عشان أنا هبقى لسه صغير وكده يعنى خليكى طيبة وحنينة زى ما انتى :D وبالنوسبة للتكيف انا عارف انك مش هتستحملى الحر ولا انا هرضى انك تستحمليه يعنى فهتصرف بقى وابقى اجيبلك تكيف :D .. اه انا أستلفت من بابا النهاردة فلوس بعيد عنك كنت فعلاً مأشفر ومش معايا ولا مليم فى جيبى ومش معايا رصيد :D بس هرجعهمله اول الشهر لما اخد مصروفى تانى :D مهو انا لازمن اكيف نفسى انى اصرف امورى باللى معايا عشان أعرف أبقى اظبط أمورى لما نبقى نتجوز وكده بقى :D

أه، على فكرة أبقى أقرى وانتى ساكتة عشان كلامك أحيانا ً بيفصلنى اوى :D

نفسى أقولك حاجة! - مرسال لحبيبتى - القصقوصة التلاتة والتسعين

2011-07-27T20:00:00.000+02:00

حبِيبْتِي .. حبيبتي
شرطه مايله
فرااااااغ
وهكتب ليه حروف إسمك ؟
ما هو إنتي في قلبي .. ساكنه القلب عارفه بقصتي وحالي
ومين غيرك في قلبي أكتب له مرسالي
.. أما بعد
مانيش عارف ده جوابي الكام
ماعونتش بحسب الصفحات ماعونتيش بحسب الأقلام
ماعونتش بحسب اللي ضاع من الأوهام .. كفايه إني بحبك بس
وقلبك لو بقلبي حس .. أو شاف حاله في بعادك
لصلي ربه وإستغفر لذنبه وصام
وياما في نفسي .. ياما ياما ياما ياما يامـــــــا
في نفسي .. تيجي لقلبي وتحني
ولازم تعرفي .. إني لا أنا عفريت ولا جني
بحبك بس إيدي أقصر كتير مني .. فمش هقدر أجيبلك من الدهب كفه
وأجيبلك من الياقوووووووووت كفة .. ومش هقدر أجيب الوالي في الزفة
ومش هقدر أجيبلك بيت يموت القطر لو لف في حماه لفه
كفايه إني بحبك مووووووت .. وحب الناس ندامه وعار وحبي عكسهم عفة
و لو ترضي فـ عندي شروط
أنا طبعاً بحبك موت .. ولكن بردو ليا شروط
أنا عايزك تكوني في الوريد دمه .. وتبقي في عقلي أنا همه
و تبقي ورد جوا القلب غيري يشوفوا يتحسر ولا يشمه
وعايز رمشك الجارح .. صراط يجرح فؤاد غيري مايرحمشي وأنا أجيلك
أعدي فوق صراط رمشك ولا أخافشي .. وحتي لو وقعت في يوم من الخبطة
أقع في عنيكي و أتوضي .. وأصلي ركعتين لله
وأبوس نن العنين .. وأمشي لأ أنا طماع ولا في طبعي الأنانية
جناين قلبي راح تفضل .. ولو طال البعاد فاتحه
بحبِـــــــــــك قولتها بالكسره .. نفسي أسمعها بقي بالفتحه

عارفة ناس كتير اوى دخلت وقالتلى ع التدوينة بتاعت امبارح انها مش وحشة ومش حلوة بس انا بكتب احسن من كده! اه انا عارف انها مش حلوة عشان انا معملتش فيها اى حاجة، انا حسيت فجأة انى عاوز اكتب وكتبت ومراجعتش اى حاجة كتبتها يمكن لو كنت راجعتها وفكرت اكتر وانا بكتبها يمكن كنت طلعتها أحسن من كده بالأسلوب المعتاد بتاعى، اصلك متعرفيش ان المقالة أصلاً طبخة زيها زى الصورة بالظبط .. يعنى عشان تطلعى صورة حلوة لازم تفكرى هتاخديها من انهم زاوية وبعد كده تبدأى تجهزى إضائتك او توظفى أضاءه المكان صح عشان تخدمك فى الصورة وبعد كده تلعبى حبه إيديت ع الصورة عشان تطلعيها حلوة اهو المقالة بقى كده بالظبط .. بتيجى الفوكيرة وبعد كده ابدأ اشوف هتناولها ازاى ومن انهم زاوية واقعد افتكس لغاية لما الاقيلها زاوية جديده محدش تناولها قبل كده وأبدأ أفكر تانى وتالت ورابع وبعد كده أبدأ اكتبها وعارفة أقل تدوينة بكتبها بتاخد منى تلت اربع ساعات .. احياناً بكتب سطرين واقعد أسرح فيهم وبقوم اجيب اكل واعمل شاى ونسكافية وكل الحاجات اللى انتى عارفاها دى .. وفى الاخر أقعد اقرا الموضوع مرتين تلاته وهوب ينتشر، اهو انا أمبارح بقى معملتش حاجة من دى خالص انا كتبت الموضوع وهوب اتنشر على طول، معملتش الطبخة تمام يعنى :D ألا صحيح بمناسبة الطبيخ، هوا انتى بتعرفى تطبخى ولا لأ ؟ :D .. شكلك مش بيعرف يطبخ .. مش مهم انا بعرف اطبخ حبه كده على قدى .. واهو أنا وانتى نتعلم الطبيخ مع بعض .. أحم، انا عارف انى مش هعرف اتعود على اكلك بسرعة عشان متعود على اكل ماما .. مش عاوز اقولك يمكن ماما مثلا ملحها فى الأكل زيادة او اقل بس خلاص بقى ملح ماما هو المعيار بتاعى فى الحكم على اى اكل بره يعنى اللى بيقل عن اكل ماما بعتبر اكله ناقص ملح واللى بيزود عن ملح ماما بعتبره مزود ملح :D .. بس مش تقلقى هبقى اقعدك مع ماما كتير عشان تبقى تظبطى الملح بتاع الاكل بتاعك :D

عارفة زى ما فى ناس كتير اوى قالولى على تدوينة أمبارح انها مش بحلاوة الحاجات اللى بكتبها على قد ما فى ناس برضه عجبتهم اوى .. عارفة ريهام؟ ممم مش عارفة ريهام، مش تقلقى هبقى اعرفك عليها مره .. ريهام بقى اول لما شافتنى النهاردة قالتلى حلوة اوى التدوينة بتاعت أمبارح وقالتلى بس طويلة اوى، البنت زمانها اتشلت وهيا بتقرا كل ده .. ألا هوا انتى قريتى التدوينة بتاعت امبارح دى اساساً ولا لسه؟ :D

انا من النهاردة قررت انى كل فترة كده اكتبلك جواب، اه جواب وهحطه فى ظرف كبير اوى واقعد اجمع فى الجوابات كلها مرة واحده وابقى اديهملك فى يوم ما واقعد انا وانتى نقراهم ونضحك .. بس أنا مبسوط النهاردة وهنزل اخرج كمان شوية واروح اقعد مع العيال صحابى رفقاء البُئس فى الحب فى الجُنينة اللى قدام المحافظة ونشترى فل من الراجل تانى ونقعد نغنى تانى ونعلى صوتنا زى ما عملنا من كام يوم ونقعد نصور نفسنا واحنا فى حال انبساط كامل وهتكلم عليكى النهاردة وكل واحد هيتكلم برضه، اصلك متعرفيش أن احنا مش بنضم المستمعين للمجموعة بتاعنا، لع لازمن يكون عندك قصة وفيها أكشن عشان يخش معانا .. كل واحد فينا بيحكى ونقعد نخطط كلنا مع بعض ونشوف هنعمل أيه .. عارفه بنفرح اوى لما حد فينا تبقى اموره مستقره او يكون خلاص بيظبط الدنيا عشان يخطب .. اه يخطب مهى المشكله انهم كلهم أكبر منى :D بس عادى مهو انا كمان سنتين تلاته هبقى كبير كده زيهم وهاجى اقولك انى عاوز اخطبك :D

عارفة أيه الحاجة اللى كان نفسى اقولهالك اوى؟! نفسى تخليكى حلوة كده من جوه زى ما انتى مهما حصل، ممكن بقى؟!

تعرفى؟ - القصقوصة التمانية والتمانين

2011-07-26T21:41:00.005+02:00

Think of me
Oh you who I love
My heart chose you
And I don’t know what to do
Now you’re by my side
But tomorrow, who knows?
That’s how the world is
Sweet and bitter at the same time

تعرفى؟ على قد ما بحس انك قريبة أوى منى لما بتكلم معاكى على قد ما بحس انك بعيدة أوى أوى برضه، مش عارف انا أيه التناقض ده بس عارفة انا عاوز اقولك على حاجة .. مممم، فاكرة صاحبى اللى كُنت بحكيلك عليه كتير؟! انا عاوز اقولك أنه طلع أشطر واذكى منى .. عارفة ليه؟! عشان سابنى كل الفترة دى مفكر أنى انا اللى كسبان وعمال اكسب جولة ورا جولة ومستمتع وبتفاخر بالجولات اللى انا عمال أكسبها .. بس هو طلع أشطر منى وبضربة واحدة بس كسب المعركة كلها .. اه المعركة كلها، خلاص مبقاش فى جولات تانى .. لازم أعترف انه هو اللى كسبان فى المعركة دى، يمكن أنا كنت محتاج اعترف فعلاً أنى خسرت المعركة دى كلها وحتى الجولات اللى كنت بكسبها كان هو اللى بيسيبهالى بمزاجه، من الاخر يعنى طلعت انا أى كلام :D بس بجد وبعيداً عن كل حاجة أنا لازم أرفعله القبعة، كان هو الاجدر بالفوز.

تعرفى؟ واحد صاحبى كُنت بتكلم معاه على التعقيد بتاع الحب، والكلام خدنا وودانا بس قالى نظرية جديرة بالتوقف قدامها شوية! قالى عارف انت الموضوع دايماً بيبقى صعب ليه ومتعقد؟ قولتله ليه؟ قالى عشان دايماً الشخصية اللى أنتا بتختارها ده بتبقى فعلاً مختارها عشان تكمل معاك حياتك وتبقى ام لأولادك عشان كده دايماً الموضوع بيتبقى متعقد وصعب وغريب ومش راضى يكمل، عشان هيا بتبقى حاجة كبيرة اوى فى حياتك فلازم تعانى عقبال ما توصل ليها.

تعرفى؟ انا ظلمت ناس كتير اوى :D .. احم، ايه كُنتى مفكرانى ملاك؟! هاهاهاها، لع انا مش زى ما انتى متخيلة اوى يعنى :D مش هقدر أقولك انى حد كويس لان المعاير بتختلف من شخص للتانى انا نفسى معايرى بتختلف من اسبوع للتانى :D، عارفة انتى الطبيعة البشرية؟! عارفة لما تقعدى تستنكرى على واحد انه عمل حاجة معينة وتفضل تستغرب وتقول وتعيد وازاى وفين وامتى وليه وتبقى مندهش اوى وهوب فجأه تلاقى نفسك بتعمل نفس الحاجة :D، طبعا ً ساعتها يا هتعمل نفسك ولا كانك واخد بالك ولا كانك قولت اى كلام قبل كده يا اما هتبرر لنفسك وللحواليك اللى انتا بتعمله :D، عارفة بس احلى حاجة مخليان واثق فى ربنا انه بيخلص منى اول باول :D، ايون اول باول والله :D، يعنى انا اعمل الكارثة او المصيبة من هنا هوب الاقى الدنيا اتسدت فى وشى من الناحية التانية وبقوة :D، هوب أظلم حد او أغدر بيه هوب تلاقى الدنيا بقت ملعبكة لعبكة السنين وربك مابيباركش فى الحاجة خالص :D، يمكن ده بيطمنى احياناً واحياناً تانية بحسه تحذير ربانى كده من طراز " لم نفسك يا أبن أدم، انا أديتلك فرص كتير اهو وفى كل مره انتا بتصر ع الغلط " .. أحياناً كتير بحس ان ربنا مش هيفرجها تانى وخلاص بقى بح، بس عارفة ربك كبير وكريم اوى دايماً بيفرجها حتى لو عملت أيه؟ مش عارف ده هيفضل كتير ولا أيه؟ بس أى كان الواحد لازمن يلم نفسه شويه :D، يمكن الواحد عمل خير فى حياته فى يوم من الايام وربك كل مرة بيفرجها بسبب الحاجة اللى انا عملتها دى بس الحاجة دى مش هتشفعلى كتير :D، بس عارفة والله انا بعمل خير او زى ما بيقولوا كده فيا الخير يعنى :D، احم بس عارفة فيا الشر برضه! مش هكدب عليكى احياناً أحياناً يعنى لما ببقى مش طايق حد ما ببقى فى بعض اللحظات بتمناله الشر بجد! اه عارف ان ده غلط وانى كده نفسى مش صافية بس بحاول والله أشوف حل للمشكلة دى .. ممممم، أيه وجهه نظرك فيا اتغيرت شوية؟! هاهاهاها شكلك كُنتى مفكرانى ملاك ولا أيه؟ :D لأ، خالص انا بشرى عادى جدا .. غلطاته يمكن اكتر من الحاجات الصح اللى عملها فى حياته :D بس والله عمال بحاول اتغير وبحاول اصلح حاجات كتير فيا غلط.

تعرفى؟ أكتر حاجة بتوجعنى لما بكون عامل حاجة غلط وتفوت سنة واتنين وتلاتة وخلاص افتكر الزمن موتها وفجأه تطلع وتتفتح من جديد .. عارفة انتى لما حد يفتكر الجرح ويفتحه لأ وكمان يتكه عليه :D، بتوجع اوى والله من جوه.

تعرفى؟ أنا بحب أوى أعاقب نفسى! مالك مستغربة اوى كده ليه؟! عارفة كمان بيقولوا أول حاجة لازم تعملها لما تغلط فى حد او تغلط فى حاجة عموما يعنى هى انك تعتذر للناس او للحد ده وتسامح نفسك اولاً قبل ما تهتم بالأخرين! عارفة انا بقى عمرى ما سمحت نفسى على حاجة غلط انا عملتها .. واكتشفت فجأة انى بقيت عامل زى ما يكون واحد صاحبى كل ما اغلط فيه يعديها ويقول معلش معلش معلش لغاية لما تيجى مرة ويقول كفاية ويقطع علاقته بيك اهو انا بقى معرفتش اسامح نفسى وكل مرة افتكر اى حاجة عملتها غلط أقوم معاقب نفسى مع نفسى لدرجة انى مبقتش طايقنى ومش عارف أقطع علاقتى بيا.

مفكرانى مجنون أو مريض نفسى؟! أحياناً بشك فى ده بس برجع واقول ماهو عادى ما الناس كلها مرضى نفسين وكل واحد عنده عقد ومشاكل نفسية بالعبيط! هتيجى عليا انا بقى؟!

تعرفى؟ كنت هكتب واقول انى بحاول اتغير واحسن حاجات وارجع تانى لحاجات كنت بطلت أعملها وابعد عن حاجات بقيت بعملها وكده يعنى، كنت بفكر أقول انى بعمل ده عشان خاطر نفسى والحبشتكنات دى بس أكتشفت فجأة انى بعمل ده كله عشانك انتى.

تعرفى؟ بقالى كام يوم بحلم بيكى :D، تخيلى بحلم بيكى فى كذا مكان .. مرة ع الشط ومرة فى الجنينة ومرة فى بيتنا ومرة قاعدين بنتغدى بره ومرة قاعدين فى كافية .. هاهاهاها عارفة كمان حلمت بينا وانا معاكى فى اوضة العمليات وانتى بتولدى بنتنا الاولانية وانا ماسك الكاميرا فى أيدى عشان أصور بنتنا اول صورة فى حياتها.

تعرفى؟ فى حاجة مهمة اوى نسيت أقولهالك فى أول الكلام .. " أنا بحبك اوى ".

تعرفى؟ أكيد هلاقى ناس تسألنى انتا قاصدك مين؟! بس فعلاً انا مش قصدى حد بس لو انتى حسيتى ان الكلام ده ليكى فمتستغربيش عشان هو بجد ليكى!

لكنى مش قلقان!

2011-07-20T04:48:00.003+02:00

'Cause I can't help it if you look like an angel
Can't help it if I wanna kiss you in the rain so
Come feel this magic I've been feeling since I met you
Can't help it if there's no one else
I can't help myself

نعشق فى بعض الاحيان الإختفاء خلف طفولتنا فى محاولة لخداع انفسنا باننا لم نكبر بعد ومازلنا نتمتع بتلك الصلاحيات التى تُعطى لصغار السن، نخشى دوماً أن يعاملنا الأخرين على اساس اننا كبار فى السن واصبحنا نعى الحياه ونقدرها ونعى أيضا صعوبتها ومشاكلها ..

من منا لا يعشق حب الظهور؟! جميعنا نعشق حب الظهور .. هناك من يرتضى بالظهور امام صديقيه واخر امام اصدقائه الكثيرين وأخرين تتسع الدائرة التى يرغبون فى الظهور فيها! ولكن الحكمة ها هنا هو التحكم فى الكيفية والكم! نعم، فى بعض الأحيان علينا ان نختفى وان نمتنع عن حب الظهور فقط لكى نُظهر للأخرين مدى تواضعنا، بل ان الذكاء الأجتماعى يُحتم عليك فى بعض الاوقات الدفع بأخرين بدلاً منك على الرغم من قدرتك على فعل ما يفعلونه هم افضل ولكن لكى تظهر بمظهر راعى المواهب وحتى لا يتهمك الأخرين بالغرور وحب الظهور عليك ان تتنازل فى بعض الاحيان للأخرين لكى يصعدوا بدلاً منك .. حينها صدقنى سيرغب الاخرين فى معرفة سبب اختفائك بدلاً من ان كُنت متاحاً لهم طيلة الوقت! كما انه سيتم الإشادة بك لأنك تفضل الاخرين عليك فى أحيان كثيرة! هل اخبرتكم من قبل ان الحياة لعبة؟! لا، ممم إذا ها انا اخبركم الأن ان الحياه لعبة وعليك ان تفهم وحدك قواعد اللعبة وتلعبها باقل قدر ممكن من الخسارة، نعم الخسارة! فلا احد ينجح فى تلك اللعبة .. فقط لنقل الرابح هو الخاسر الأقل تضرراً .. فالحياة ما هى إلا وسيلة لغاية اكبر.

"فقط الناجحين فى عملهم هم من يتعرضون للأنتقاد" .. ربما صادفت تلك الجملة التى كتبها صديق لك على فيسبوكِه أو محتوى قريب من مفهوم تلك الجملة! .. بالطبع جميعنا ناجحين وجميعنا مميزين وجميعا نتعرض للانتقاد او يذم فينا الاخرين لانهم يعانون من عقده النقص لأنهم لم ينجحوا النجاح الساحق الذى حققناه نحن! كل من ينتقدنا هو شخص يتلكك لنا، كل شخص منا له أعداء كثيرين وبالطبع هم أعداء النجاح! هكذا تجد تلك الجملة او شىء قريب من ذلك المحتوى مكتوب على أغلب حوائط فيسبوكاتِنا! .. جميعنا اشخاص ناجحون ومميزون ونخدم البشرية ولكن لا احد يعلم لاننا نعمل فى صمت ولا نحب الشهرة ولا نُحب ان نُعرف الاخرين أننا اشخاص ناجحين وان الاخرين يهاجموننا بضراوة! كل ذلك يدفعك للتساؤل : "لماذا إذا العالم مازال بهذا السوء؟!"

"حمزة، هوا انتا كُنت متوقع فى حفلة طنطا كل التفاعل ده من الجمهور؟!" بالطبع تعمدت ان اسأل حمزة نمرة ذلك السؤال فى تلك المرة التى التقيته فى مجلة كلمتنا من اجل اجراء حوار معه حول مشوارة الفنى .. بالطبع السؤال غرضه وهدفه الاول هو الظهور البحت الذى تحدثت عنه بالاعلى .. بالطبع كُنت اعلم الأجابه مسبقاً ولكنى بالطبع لمذيداً من الظهور اخبرته انه بسببه تشجعنا نحن وتعاقدنا مع فرقة بساطة لانه ابهرنا بهذا الكم الذى حضر فى طنطا وجعلنا نُدرك ان هناك جمهور يتذوق المزيكا حقاً فى طنطا .. بالمناسبة يعتبر حمزة نمرة حفلة طنطا التى أُقيمت بعد الثورة واحدة من اروع الحفلات التى قدمها لذلك التفاعل الرائع غير المتوقع من الجمهور .. الحوار كاملاً سيُنشر فى عدد أُغسطس - مجلة كلمتنا .. ربما تعتقد الأن أننى ربما كتبت تلك الفقرة رغبتا ً منى فى التنطيط عليك لاخبرك اننى قابلت حمزة نمرة وجلست معه ساعتين ونصف قضى هو خمسة واربعين دقيقه من الغناء فقط وغنى لنا اغانى من الألبوم الجديد فى قاعده ع الضيق! لا بالطبع ليس هذا هو السبب، السبب هو اننى اريد أن اخبرك ان حمزة نمرة قادم إلى طنطا مرة اخرى فى القريب العاجل وفى موعد سيناسب الجميع خصوصاً طلبة الطب المقهورين بل سيتجاوز الامر لمجرد تحديد موعد مناسب لطلبة الطب! واعتقد انه ربما سيتم الإعلان رسمياً عن التفاصيل فى خلال الأسابيع القادمة! ربما ستكون هذه اكبر حفلة ستقام فى مدينة طنطا .. فقط أردت ان أبهجكم قليلاً واخبركم ان حمزة نمرة قادم قريبا ً ..

ربما هى المرة الاولى التى أخبركم فيها اننى لست قلقاً! اتعلمون لماذا؟! بالتأكيد لأن تذكرتى رايح جاى!

تذكرتى رايح جاى!

2011-07-14T02:03:00.006+02:00

Fly me to the moon
Let me play among the stars
Let me see what spring is like
On a-Jupiter and Mars
In other words, hold my hand
In other words, baby, kiss me

على باب الله ماشى فى حالى فى ظلمات الليل أسير فى الطرقات مستمتعاً بتلك الأصوات المختلطة من صوت سيارات وباعة جائلين واخرين يتحدثون عن الفتيات واخرين عن الفتيان! كل تلك الأصوات تصنع لك مزيكا صاخبة محببه للنفس يطلق عليها البعض لفظ " دوشة " .. ولكننا فى بعض الأحيان نُصبح فى أشد الحاجة للأستماع إلى تلك الموسيقى الحياتيه ونحن نسير فى الطرقات ناظرين إلى سواد الأسفلت متمنين الا تُصبح حياتنا بذلك السواد القاتم.

بينما انا وهو نسير ألتفت إلى فجأة واخبرنى انه فعل لها كل شىء ولكنها لم تهتم وتكترث! فعاجلته بأبتسامه وأخبرته اننا من تلك الكائنات التى تفعل كل شىء بل فى بعض الأحيان بنتشقلب ارجوزات ولكننا لا ننجح بتاتاً بينما اخرين بمنتهى السهولة يحصلون على ما يريدون دون كل تلك المعاناه التى نُعانيها! هناك حكمة إلهية بالتأكيد فى فشلنا!

هاتفنى هو ذات يوم ليلاً ليطلب مقابلتى وانا اعشق السير ليلاً ولم أكن بحاجة إلى القليل من التفكير لكى أعلم ان الامر تلك المرة به رائحة فتاة!، هكذا بدأت المعلومات تتساقط من فمه .. متى وأين وكيف وكل تلك الحكاوى التى يشعر المرء براحة حينما يحكيها لاحد اخر ليشاركه التفكير! أخذنا نفكر سوياً ونحلل كل شىء وكُنت رائعاً كعادتى فى وضع الخطط والحلول، ولكنه كان قاسياً على حينما اخبرنى فجأة بانه يريد ان يسير الأمر بشكل مثالى فهو لا يريد أن يُصبح مثلى فى معاناتى ولا يريد ان يُحب أحداهن ولا تبادله هى اى مشاعر! عاجلته ضاحكاً " هوا انا كمان بقى بيضرب بيا المثل؟! " .. أخبرته انه على الرغم من قسوة العبارة إلا انها تحمل قدر كبير من الصواب وهكذا اعدنا التفكير ووضع الخطط والتحليل من اول وجديد حتى لا يقع فى الأخطاء التى وقعت فيها وحتى لا يُصبح مثلى!

أخبرنى انه يريد ان يأخذ رأى فى موضوع ولأن العادة دوماً ان الاخرين يأخذون رأى فى مواضيع الحب لما اكتبه دوماً ها هنا ولكن العجيب ان الجميع يعلم بفشلى الذريع ولكن مع ذلك هم يُصرون على انا لأكون خير ملجأ لهم! ربما هى خبرة الفشل التى اكتسبتها! هكذا أخبرنى ببساطة ان يخشى ان يكون الأمر مجرد اعجاب فقط وليس حب! كما انه يخشى ان يكون فقط معجب بكتاباتها فقط! .. لماذا دوماً نخشى ان نكون معجبين بشخص ما؟! الأمر الطبيعى هو ان نُعجب بأحدهم ومن ثم يتطور الامر إلى حب! دعك من اننا نخشى فى بعض الأحيان ان نكون مُعجبون بشىء فى ذلك الشخص فقط! إذا ما هو الحل؟! هو ان تعرف باقى الأشياء عن ذلك الشخص، ان تحاول الإحتكاك به او محاولة التعرف على طريقة تفكيره مثلاً لكى تحكم على شخصيته وبالمناسبة هذه أشياء مشروعة ان كُنت تُفكر جدياً ان تتعرف على شخص ما من اجل الأرتباط الرسمى! صدقنى انا أُبيح لك ان تستقى المعلومات وتبحث وتحاول معرفة كل شىء عن ذلك الشخص قبل ان تقع فى هواه وتكتشف بعد ذلك انه ربما ذو تفكير عقلى متخلف،عذراً اقصد مختلف!

فترة نقاهه استمرت ربما لثلاثة شهور او أكثر .. هدوء ممتع واعادة تقيم لكل المواقف! انها تلك اللحظات التى تشعر فيها براحة البال .. انها تلك الفجوة التى أسقطت نفسك فيها عن عمد .. بالتأكيد لن تقبل ان تخوض تجربة اخرى يسفه فيه الطرف الاخر منك معتبرك مجرد عيل وبيلعب او بيهزر بعد ان قضيت عامين كاملين لا تفعل فيهما شىء سوى التفكير بمنطقية وعقلانية حول امكانية تحقيق ما تحلم به! كُنت تخطط وتتمنى وتحلم ليأتى احدهم بهدوء شديد ويعتبرك مجرد عيل وبتلعب وأشياء من هذا القبيل!

أتعلم؟! انا اعلم انك قادر على تخطى كل ذلك العك والمعمعة، بل انا واثق انك قادر على ذلك .. اعلم انك قادر على الحياه مرة اخرى وعلى ان تواصل ما تفعله .. صدقنى اعلم انك قادر على الحب والعشق مرة اخرى .. فقط اعطى نفسك فرصة الحياة مره اخرى! لن اضغط عليك اكثر من ذلك .. خذ ما تريد من الوقت فى فترة النقاهه تلك .. شهر شهرين عام عامين! فقط تذكر ان الحياه لا تنتظر احد ولو ظللت ناقماً عليها طويلاً ستبادلك هى ايضاً نفس الشعور وحينها لن تحصل على الفرصة! .. عجل من عودتك فانت قادر على الحياة، انا أثق بك يا عزيزى وعليك ان تثق انت ايضاً بنفسك قليلاً!

أسكندرية ليه؟!

2011-07-06T21:03:00.001+02:00

فى بعض او لنقل فى كل الأحيان تتحد كل قوى الطبيعة الشريرة من اجل ان تجعل حياتك جميلة! .. دعونى اعترف انك ربما تظن ان مدينة الأسكندرية اصبحت ( بتلم! ) وربما تظن ان مطروح هى الأروع الان .. او ربما هى الغردقة أو شرم الشيخ هما افضل الاماكن الأن لقضاء صيف ممتع! .. صدقنى ربما انت لا تعرف الأسكندرية حق المعرفة!

لا أحد يُنكر ان روعة الاسكندرية تكمن فى فصل الشتاء .. مع جيلاتى عزة والتمشية ع الكورنيش فى ذلك الجو قارص البرودة ضامماً ياقة الجاكت!

وتكمن روعة الأسكندرية صيفاً أيضاً فى أواخر شهر خمسة واوائل شهر سته قبل أيام الزحف المقدسة فى شهر تمانية وتسعة!

الأسكندرية تعنى ان تستيقظ فى الرابعة صباحاً لتراقب شروق الشمس من امام البحر وتمارس بعدها رياضة المشى بطول الكورنيش فقط مستمتعا ً بمزيكا تصادم أمواج البحر مع الصخور .. مزيكا ربانى كده! .. ممسكاً بكاميرا قد يخاف منها البعض إلا ان اهالى الاسكندرية يتذوقون الفن بصورة مرعبة .. هكذا تجد احد الصيادين يُعطيك وقفة التصوير ويبتسم لك منتظراً ان تخبره انك انتهيت من ألتقاط الصورة ويبتسم لك ويمشى فى هدوء .. فى الأسكندرية فقط تجد تلك الفتاة التى تستيقظ مبكرا ً لتمارس رياضة الجرى بطول كورنيش الأسكندرية وتتلمس فيها ذلك الجمال السكندرى الهادىء فتبتسم لها فتبادلك الأبتسامة دون تكلف! .. الوجوه فى الأسكندرية كلها بشوشه مبتسمة!

فقط فى ليل الأسكندرية الساحر تقابل صديقك لتسير فى شوارعها ليلاً عازفاً هو على أله الهارمونيكا مدندناً انت خلفه بكلمات الأغنية التى يعزف لحنها على الهارمونيكا ..لا أحد يرى غرابة فيما تفعل على الرغم من انك فى الثانية صباحاً!

البعض يرى مطروح اجمل وشواطىء سيناء ساحرة ولكن بكل صدق وإخلاص حينما يسألنى احدهم أسكندرية ليه؟! فان أجابتى تكون دوماً أسكندرية كمان وكمان!

***

كان الامر مُربكاً لك فانت لا تدرى ماذا كُنت ستفعل بتلك العلبة حقاً؟! وهكذا كان الأمر بسيطاً انتظرت يوم عيد ميلادك الذى لم يتذكره احد تقريباً! ونظرت إلى نفسك فى المراية متمنياً لنفسك عام ربما قد يكون أقل ضرراً من العام الماضى! واعطيت نفسك تلك الهدية مخبراً نفسك ان الحياه لا تسير دوماً على وتيرة واحدة وان ربما ذلك الأسوء الذى انت تظن نفسك فيه ما هو إلا الأفضل والأسوء قادم فى الطريق!

نسم عالينا الهوا من مفرق الوادى! - اليوم الواحد والعشرين

2011-06-21T19:54:00.003+02:00

اليوم الواحد والعشرين من حملة التدوين اليومى .. شهر يونيو

الأمر فقط كالأتى .. صوت فيروز يخرج من موبيلك منتقلاً عبر الهيدفون إلى اذنيك .. كان بيبسى بجوارك .. كيس شيتوس كرانشى! .. تجلس بمفردك فى تلك الحديقة على الطريق السريع فى الواحدة بعد منتصف الليل .. لا تُفكر! نعم، هى واحدة من تلك اللحظات التى يحدث لك فيها فجوة فكرية! نعم، لا إرهاق للعقل ها هنا بأى نوع من انواع التفكير .. هو صوت فيروز فقط الذى يبعث على الراحة والتأمل والامل أيضاً ..

أدام الله لنا صوت فيروز عملاقاً أمد الدهر ..

التحرش الــ -لا مؤخذة- ــجنسى! - يوم التدوين ضد التحرش الجنسى - اليوم العشرين

2011-06-20T18:54:00.001+02:00

اليوم العشرين من حملة التدوين اليومى .. شهر يونيو

هذه التدوينة ضمن يوم التدوين ضد التحرش الجنسى

أنا مفيش حاجة بتعفرتنى أد حوار المعاكسات او التحرش الجنسى! بيركبنى ميت عفريت وبزعق لما بشوف واحد بيعاكس واحدة وبتبقى ليلته مهببه لو اتحرش بيها جسدياً ومبرحموش لو كان عيل صغير وهيا كبيرة!

الأمر بأختصار اننا نتعامل مع المرأة على انها عورة وحاجة عيب! لا اتحدث عنا بالتأكيد، انا اتحدث عن فئة عريضة من هؤلاء الأطفال ما دون الخامسة عشر من عمرهم! .. اغلب الاولاد لا يتعاملون مع الفتيات ألا فى سنوات متأخرة ويعتبرونها ذلك الكائن المبهم الذين يسعون لإكتشافة وتحسسه! .. البعض ينشأ بتربية دينية سليمة وأسس أجتماعية جيدة تمكنه من التعامل مع الفتاه او المرأة من منطلق قواعد دينية محددة ولكن الأغلبية العظمى لا تنشأ على تلك التربية السليمة ويعتبرون حقاً من حقوقهم المعاكسة والتحرش، ويعتبرون زعيق الفتاة لهم ووصفها لهم بقلة الأدب والسفالة وساماً يتفاخرون به بينهم وبين أصدقائهم!

من حق الفتاة غير المحجبة ألا يُنظر لها نظرة دونية وانها نازلة من بيتها عشان تتعاكس! ولا يجب دوماً ان تُلقى شماعة التحرش والمعاكسة على الفتيات ولبس الفتيات! نعم، نحن ننتقد لبس الفتيات ولكن أيضاُ أين التربية السليمة؟! أين المجتمع الذى يراقب ويحمى الانثى من تلك الممارسات! فقط انت كل ما تفعله فى اغلب الأحيان هو ان تنظر للبس الفتاة قائلاً "بصراحة، ماهيا اللى تستاهل شوف يا جدع لابسال أيه؟! هيا اصلاً نازلة عشان تتعاكس؟"

المجتمع أصبح مجتمع ذو نظرة ذُكورية! قبل ان نلقى باللوم على الفتيات فلنُلقى اللوم على هؤلاء الفتية ونحاسبهم.

ولأى فتاة هنا! غير مسموح لأى شخص ان يعاكسك فى الشارع أو أن يتحرش بيكى! .. ولو حد عاكسك صوتى ولمى عليه الناس وهزقى فيه وافضحيه! أما لو تحرش عليكى وعلى القسم وصوتى .. مبهزرش! صوتى ولمى عليه الناس .. فككم من الحلول النفسية والمنطقية اللى شكلها شيك اللى علماء النفس بيناقشوها على التلفزيون وفى الندوات وتلاقى الناس كاتبه المشكله وحلولها النفسوية اللى لازم تتطبق! فكك والله من كل ده .. انتى تصوتى وتلمى عليه الناس وربنا يُرزقك بأبن الحلال مفتول العضلات اللى يكون ماشى فى الشارع صُدفة ويمسك اخينا ده ويعلمه الأدب!

هذا هو الحل ببساطة، الردع! يجب ان يُردع هؤلاء .. ويجب ان تُطبق قوانين لحالات التحرش، قوانين صارمة.

البلاى ستاشين! - اليوم التسعتاشر

2011-06-19T19:35:00.001+02:00

اليوم التسعتاشر من حملة التدوين اليومى .. شهر يونيو

السعدنى ممسكاً بدراع البلاى ستاشين

بُص يا ابنى الدنيا دى عاملة زى البلاى ستاشين تو! .. ( احم معندناش بلاى ستاشين ثرى، نعمل أيه يعنى؟! ) .. خصوصاً فى لعبة المصارعة النسائية! من الاخر اللى بيفوز هو اللى بيقلع ويعرى الطرف التانى! ويا تمسك دراع البلاى ستاشين عدل وتلعب بقواعد اللعب وتعرى اللى قدامك! يا هو اللى هيعريك!، يا أما تفضل طول عمرك واقف عمال تقول "يا جدعان غيروا ام اللعبة الزفت دى!" يا أما تاخدها من قاصرها وتروح تشد الفيشة بتاعت الدنيـ .. أحم، قصدى فيشة البلاى ستاشين!

ابتسامة!- اليوم التمناشر

2011-06-18T17:34:00.003+02:00

اليوم التمناشر من حملة التدوين اليومى .. شهر يونيو

المتعة كل المتعة حينما تقابل هؤلاء البشر الذين يخبرونك والسعادة تملأ وجوههم بأنهم لم يُجبروا أحداً فى حياتهم على فعل شىء من اجلهم ولم يجعلوا احدهم متعلق بهم بشكل أو بأخر! .. هؤلاء البشر غير مُدركين أن هناك الكثير جداً من الأشخاص إلتحقوا بنفس الاماكن وأصبحوا يعتادون على تناول الغداء كل خميس أو الذهاب يوم الثلاثاء إلى المكان العلانى من اجل أن يُصبحوا معهم .. بل أن البعض يغير حياته ويختار أختيارات تؤثر على مستقبله هو شخصياً فقط من اجل ان يتواجد فى نفس المكان الذى يتواجدون هم فيه، فقط حتى يشعروا بالامان على ذلك الشخص وبأنهم حوله إن أحتاج المساعدة فى وقت ما! وبينما يغير الاخرين ويبنون حياتهم من اجل الاخرين تجد الاخرين يبتسمون فى سعادة بانهم لم يجبروا احد على فعل شىء من اجلهم او التضحيه من أجلهم!، وفى نفس الوقت انت تُشفق على الاخرين لانهم اختاروا ان يُضحوا فى صمت، وتُصبح أقصى أمالهم وطموحاتهم فى الحياه ان يروا هؤلاء الأشخاص سعداء.

رجاء فليبحث كل منا حوله محاولاً إكتشاف هؤلاء الأشخاص ومنحهم أبتسامة فقط أبتسامة، لا اطالبكم بأكثر من ذلك .. لا أطالبكم باى وعود هاهنا او أى كلام مُلزم لكم! فقط هى أبتسامه، وصدقنى .. ستعنى الكثير لهم.

الأرشيف! - اليوم السبعتاشر

2011-06-17T20:13:00.001+02:00

اليوم السبعتاشر من حملة التدوين اليومى .. شهر يونيو

"غسيلى زى الفل!"

تعليق يس عمر، تصوير محمد اسامة

أنا من المهتمين بالصور وبتوثيق الذكريات على الرغم من ان هذا يؤلم فيما بعد! فى كل مره تتذكر فيها ذكريات ولت او أشخاص اختفوا من حياتك ومازلت صورهم معك انت تتألم وتتذكر ان تلك اللحظات لن تعود مرة أخرى ولكن لا تُنكر تلك البسمة التى تُرسم على شفتيك كلما ترى تلك الصور المُضحكة التى أُلتقطت لك أو ألتقطتها أنت لأصدقائك!، فقط ان كُنت من هؤلاء الأشخاص الذى تمتلك أكثر من 10 جيجا خالصة عبارة صور لكل الأيام التى قضيتها مع أصدقائك مقسماً إياها حسب المكان والزمان، ارجوك شاهدها الان كلها وأجمع كل الصور المضحكة والغير عادية فى فولدر واحد وأعطيه لأصدقائك! صدقنى أنه لمن الممتع فى احيان كثيرة ان تسترجع تلك اللحظات المُضحكة من حياتنا فهى تُعطينى القوة اللازمة لكى نواصل ما نفعله دوماً، البقاء أحياء!

حينما تُصبح كلمة السر هى الحيادية الإعلامية! - اليوم الستاشر

2011-06-16T21:40:00.000+02:00

اليوم الستاشر من حملة التدوين اليومى .. شهر يونيو

بإختصار وبكلمات قصيرة مقتضبه!، المثال هنا هو حلقة الإعلامية منى الشاذلى مع عضو الإخوان المحامى صبحى صالح .. أحم، اعلم اننى متأخر فى تناول ذلك الامر ولكنى اصلاً لم اكن انوى التحدث فى هذا الأمر موضحاً رأى الشخصى لأنه بالتأكيد هناك عمالقة اجدر منى ناقشوا هذا الموضوع ولكنى مازلت أصطدم بمن يُعيب على الإعلامية منى الشاذلى ما فعلته متهماً إياها بقله الأدب! والوقاحة! وحينما يبدأ احدهم بالرد مدافعاً عن الإعلامية منى الشاذلى تجدهم يُخبرونك بكلمة السر دوماً "الحيادية الإعلامية"، ومنى الشاذلى لم تكن تلتزم بالحيادية الإعلامية! ويبدأ فى سرد الحلقة لك مرة أخرى موضحاً مناصرتها لخالد منتصر على طوال الخط ومعادتها لصبحى صالح!

لنبدأ اولاً برأى الشخصى فى تلك الحادثة!، لنتفق أولاً اننى أكره خالد منتصر لسبب لا اعلمه انا شخصياً ولكنى اكره!، وفى نفس الوقت لا أحب صبحى صالح لسبب أو لأخر! ونعم ربما لم يكن صبحى صالح مدركاً لما قالته له معدة البرنامج عن وجود خالد منتصر معه فى الحلقة، هذا شىء يحدث لكثيرين منا .. فمثلاً يهاتفك احدهم ليطلب منك أن تبتاع له كان بيبسى وانت فى الطريق إليه وحينما تذهب ويسألك عن كان البيبسى تُبدى إندهاشك وتُقسم له أنك لم تسمع ذلك وانك لم تخبره بذلك على الإطلاق!

ولكن فى نفس الوقت هناك برنامج بدأ فى اواخر 2004 وأصبح واحد من برامج التوك شو فى مصر الأعلى مشاهدة، برنامج جاحدٌ هو من يُنكر دوره الفعال أثناء قيام الثورة! دور لا يُنكره احد حتى لو بكت مقدمته بعد سماع الخطاب العاطفى لمبارك الذى اعلن فيه نيته بعدم الترشح! مثلها مثل الكثيرين الذين تأثروا بل وبكوا! انا نفسى ترقرقت الدمعات فى عينى! كانت لحظات تاريخية نشهدها! ولكن كان من حقنا ان نطمع فى نصر أكبر وفعلناها! لذلك ما فعلته الإعلامية القديرة منى الشاذلى كان دفاعاً عن مصداقيه سنوات من العمل، سنوات من الجد والإجتهاد لكى يحتل برنامجها هذه المكانه! وجاء احد ما يتهمها ببساطه انها لم تخبره ان هناك ضيف معه فلم يُعد نفسه لذلك! انه يشكك فى مصداقيه سنوات! .. ثم خرج علينا أنصار صبحى صالح بعد ذلك يُخبرونك ان المكالمة مُسجلة، تلك المكالمة التى لم يسمعها احد ولم تظهر إلى الأن! .. فكر معى قليلاً ان كانت تلك المكالمة صحيحة وظهرت على وسائل الأعلام!، بالتأكيد لن تُشاهد برنامج منى الشاذلى مرة اخرى! لذلك كان من حقها أن تُدافع عن برنامجها ومصداقيتها وبقوة!

نأتى بعد ذلك لكلمة السر "الحيادية الإعلامية"، غير مطلوب بالمرة على الإطلاق ان يكون الأعلامى حيادى لا رأى له، الحيادية الاعلامية تعنى ان يعرض البرنامج او المُذيع وجهتى النظر .. فمثلاً على إعتبار ان خالد منتصر كان هو الضيف وحده فالحيادية تُلزم البرنامج وتُلزم منى الشاذلى ان تعرض وجهه النظر المعارضه لخالد منتصر او ان تُفرد مساحة فى يوم اخر للرد على خالد منتصر .. اما فكرة أن لا رأى للمذيع او الاعلامى فهو درب من دروب الخيال!، فــ أوبرا ونفرى مقدمة برامج التوك شو الأفضل والأشهر فى العالم كانت تدعم وبقوة باراك اوباما .. والكثير من الجرائد فى الولايات المتحدة الامريكية كانت تدعم من تُريد من المرشحين! هكذا مثلاً ما تفعله قناه ONTV من دعمها للبرادعى وللأتجاه الليبرالى هذا حقها ولا يقلل على الإطلاق من حياديتها الإعلامية! لذلك ليتوقف هؤلاء غير الفاهمين! عن أستخدام كلمة الحيادية ليطالب الإعلامى الذى يختلف معه فكرياً بتطبيقها!

الميدان! - اليوم الخمستاشر

2011-06-15T16:41:00.002+02:00

اليوم الخمستاشر من حملة التدوين اليومى .. شهر يونيو

فكرت أن اكتب عن الثورة وعن ما حدث بعد ذلك وكيف أننا نُضيع ثورتنا بإيدينا ولكنى فضلت ان يكتب فى هذا الساسه لأنهم بالتأكد اجدر واكثر فهماً منى لما يحدث فبينما انا أرى مصر تنهار قد يرون هم انه بالعكس، مصر تسير بخطوات واثقة وثابته نحو النهضة .. فقط ما أردت ان اقوله اليوم اننى حقاً أفتقد الميدان، واخلاق الميدان.

الحجاب! - اليوم الاربعتاشر

2011-06-14T20:57:00.002+02:00

اليوم الاربعتاشر من حملة التدوين اليومى .. شهر يونيو

الرسم من أبداع الجميل رسام الكاريكاتير شريف عرفة

ذات يوم تفاجأت فتاه اعرفها من معرفتى بـ "فلانة العلانة!" دى إزاى؟! دى مش محجبة حتى، وليها أفكار غريبة كده!

وسيظل الحجاب فكرة اعمق من مجرد بعض الأقمشة التى يتم لفها على الرأس! فالحجاب فكرة أعمق من ذلك كله .. الحجاب هو طهارة وعفة النفس قبل ان يكون تغطية للرأس! .. يستمتع الواحد منا يومياً بالنظر إلى المحجبات! .. لم أتفهم تلك الحكمة التى تجعل أحداهن ترتدى بنطال الجينز الضيق الذى يصف تفاصيل جسمها السفلى بدقة رهيبة مع تلك البلوزة الضيقة التى تصف أيضاً تفاصيل بدقة تفوق كُتب التشريح الطبى! احم، تتوقع منى ان اخبرك ان هذا يتناقض بالطبع مع انها تُغطى شعرها .. ربما قد تتفاجأ ان اخبرتك انها تقوم بعمل ربطة الإسبانيش مبينة الجزء الأكبر من رقبتها وصدرها ناهيك عن جزء لابأس به من مقدمة شعرها! وتُصنف هى نفسها محجبة! ولا يخبرنى احدكم الان أن بالتأكيد والدتها مارست عليها الضغط لكى ترتدى الحجاب! لا ضغط هنا يا عزيزى، فالام التى تسمح لأبنتها بالخروج بكل تلك الملابس الضيقة التى تصف بدقة تفاصيل جسدها! بالتأكيد هى لن تُرغم ابنتها على لف قطعة قماش صغيرة على جزء من شعرها!

تتجلى أكبر معانى التناقض حينما يرى الأخرون أن تلك الفتيات غير المحجبات هم فاسقات فاجرات! قمة العته الأنسانى والتخلف العقلى! فبينما انت ترى هؤلاء المحجبات يرتدين بناطيل الجينز الضيقة التى تصف وبدقة وتلك البلوزات التى تُخبرك تحديداً عن كم الترهلات التى تمتلكها الفتاه والذى يُصنفهمن المجتمع على انهن محجبات وان كان حجابهن ناقص ولكنهن أفضل من هؤلاء السافرات غير المحجبات! ترى انت على النقيض فتيات هم قمة الوقار والأحترام .. ملابسهن واسعة، يحافظن على التقاليد المجتمعية فى اللبس فقط هن يعقدن شعورهن بشكل جيد خلف ظهورهن! وهكذا يقع البعض فى ذلك اللبس الدينى، هؤلاء محجبات ولكن لا يلتزمن قليلاً بالحجاب! اما هؤلاء فهن وقورات يتمتعن برقى فى ملابسهن واختيارها الذى يتناسب مع تقاليد المجتمع ولكنهن سافرات غير محجبات!

وهكذا يتخذ الجميع قراره الصائب المدروس العاقل بأن هؤلاء غير المحجبات هن مجرد سافرات!

الحجاب فريضة، لا أحد يُنكر ذلك إلا جاحد! فقط لا يجب ان تُجبر فتاة على الحجاب .. يجب ان يكون الأختيار نابعاً منها هى وحدها حتى تلتزم به .. فالحجاب لم يكن يوماً قطعة قماش تُغطى به الشعور بل هو معنى وفكرة اعمق من ذلك بكثير وهناك كثيرات من المحجبات فى فهمهن للدين ولكن لا يرتدين قطعة القماش التى تُغطى شعورهن!

ميكانِزم الحب! - اليوم التلتاشر

2011-06-13T20:52:00.001+02:00

اليوم التلتاشر من حملة التدوين اليومى .. شهر يونيو

لم يتفهم هو أبداً ميكانزم الحب! تظن الفتيات حينما يأتيهن أحدهم ليخبرهن بمدى حبه وعشقه لهن أنه بمجرد أن تخبره هى بانها لا تريد أن يعلق أحد اماله عليها ولا تُحب فكرة انها تربط حد معاها ان الامر انتهى وأنها بذلك تدفع ذلك الشاب بأن يكرها! بل على العكس انه يزداد حباً لها! لأنها بذلك تعاملت بحكمة ورجاحة عقل مع الموقف وقليلات هن الفتيات ذوات العقل الراجح والحكمة! " ده من وجهه نظره هو مش انا! " .. وبالمثل فى حالة أن اخبرت فتاه ما شخص بانها تحبه وتهيم عشقاً به تجده يخبرها وبحكمة ورجاحه عقل انه لا يحب ان يربط أحداهن بجواره ويوقف حالها! وهو امامه الكثير حتى يستطيع أن يُصبح جاهزاً للحب! ظناً منه انه بهذا ستبتعد عنه الفتاه وهو فى ذلك لأحمق! .. على العكس ستتعلق به الفتاه اكثر لأنها تلمست رجاحه عقله وحكمته فى التعامل مع الامور وهى بالتأكيد تحتاج إلى شخص حكيم وراجح العقل! وما بين هذا وذاك انت مازلت بعد خمس سنوات من البحث لم تفهم ميكانِزم الحب أبداً!

الصراحه راحه! - اليوم التناشر

2011-06-12T20:27:00.000+02:00

اليوم التناشر من حملة التدوين اليومى .. شهر يونيو

لم يتفهم أبداً ذلك النفاق التى يتعامل ذلك الشخص به معه! هكذا ما ان لمحه ذلك اليوم حتى وجده مقبلاً عليه راسماً بسمة كبيرة على شفتيه قائلاً كلماته الشهيرة " حبيبى!، واحشنى والنعمة وبسأل عليك! فينك كده؟! " .. كاد أن يرد عليه كما يفعل فى كل مرة بتلك العبارات القصيرة والهمهمات الغير مفهومة إلا انه وبشجاعة اندهش من وجودها أخبره " بقولك أيه، نبطل ام النفاق بتاعنا ده .. أنا مش بطيقك ولا انتا بتطيقنى! واحنا مختلفين فكرياً فى كل حاجة فبلاش الوش الجميل ده عشان نروح نقول للناس ان احنا حبايب وان الأختلاف لا يفسد للود قضية، لأ بقى ياعم بيفسد! " وسابه ومشى شاعراً براحة نفسية مهولة متذكراً كلمات الراقصة مروة " الصراحة راحة يا خويا .. " أحم نكتفى بتلك الكلمات من الأغنية!

الله! - اليوم الحداشر

2011-06-11T20:38:00.001+02:00

اليوم الحداشر من حملة التدوين اليومى .. شهر يونيو

COPYRIGHTS © For ( Hatem Askar Photography )

اتعجب من هؤلاء الجاحدين غير العابدين لله ..
أن الله يرسم لنا كل يوم لوحة أيه فى الروعة والإبداع والجمال لمشهد الغروب .. يرسم لنا كل يوم مشهد يختلف عن اليوم السابق بل يختلف من مكان لمكان ولكن الصورة أى كان مكانها فهى صورة مرسومة بعناية ودقة تُبهر الناظر إليها .. يرسم الله لنا كل يوم صورة الغروب الذى نتأملها فى حنين وشوق ولهفة .. صورة الغروب التى تبعث دوماً على الراحة النفسية مهما كانت حالتك النفسية سيئة ..

ومع كل ذلك هناك الكثير من الجاحدين غير المؤمنين بعظمة الخالق فى الإبداع .. هؤلاء حقاً لحمقى!

مرسال لحبيبتى! - اليوم العاشر

2011-06-10T19:26:00.002+02:00

اليوم العاشر من حملة التدوين اليومى .. شهر يونيو

أتعلمين؟! انا لا اعلم تحديداً هل انتى الامس ام الآن أم غداً .. انا صدقاً لا اعرف من تكونين! .. نعم ربما اتمنى، ولكن انتى مثلى تعلمين بأن ليس كل ما يتمناه المرء يدركه! نعم بالتأكيد تعلمين ذلك، فبالتأكيد لقد مررتى مثلى بالعديد من التجارب!

أتعلمين ربما كُنتى حمقاء مثلى ذات يوم حينما اعلنت منذ سنين ماضيه بأن الحب هو شىء تافه لا وجود له خاصة ونحن فى سن المراهقة! .. أو ربما كُنتى مثلى حينما أُغرمتى لأول مرة بفتى فى مثل سنك واحببتيه بعنف وقوة .. ربما، نعم ربما كُنتى مثلى أيضاً حينما عشقتى احدهم .. او ربما انتى من هذا الطراز الذى يؤمن بأن كل شىء يأتى فى موعده لذلك انتى لم تفكرى ان تمرى بتجارب الحب ولم تسمحى لنفسك بان تُحبى احدهم وتنتظرين ذلك الشخص المناسب الذى يطرق بابك ويأتى الحب بعد الزواج!

أياً من تكونى! صدقينى حينما تُصبحين أنتِ أنتْ! فأنا أعدك ان يكون حبى لك عفه على عكس حب الاخرين الذى هو ندامة وعار ..

صورة وحدوتة - الصورة التانية - اليوم التاسع

2011-06-09T16:07:00.000+02:00

على الرغم من أنك تعشق فن التصوير الفوتوغرافى إلا انك فى الأصل تكره الذكريات فمابلك بالذكريات الموثقه؟!

اليوم التاسع من حملة التدوين اليومى .. شهر يونيو

بحب الصورة دى جدا جدا جدا .. معرفش إيه اللى فيها مميز؟! ويمكن أكون اتصورت صور كتير احلى بس دى بحبها وخلاص!

واحدة من اجمل لحظات حياتى واحنا بنصور الفيلم التانى الخاص بحملة مكافحة مرض الإيدز .. على الرغم من أن الفيلم ده طلع ناقص والمفروض كان جزء كبير لسه هيتصور بس بسبب ضيق الوقت وعدم وجود امكانيات عشان نطلع اللى كنا متخيلينه فى بقية المشاهد اكتفينا بالجزء اللى صورناه مع تعديلات طفيفة فى السيناريو ..

الفيلم ده بالذات أكتر فيلم انا بحبه واكتر شغل انا صورته بعتز بيه اوى .. على الرغم من ان الناس كلها كانت شايفه ان الفيلم الأولانى معمول فيه شغل كتير اوى والدراما فيه عاليه إلا انى بعتبر ده أحسن بكتير من الاول على الأقل بالنسبة لفريق العمل على المستوى التعلميى والإبداعى! أتعلمنا كتير اوى من الفيلم الاولانى على الرغم من ان الفرق فى التصوير ما بين الفيلم الاول والتانى لم يتعدى الأربع تيام .. بس بجد كونك بتشتغل مع فريق بيطور نفسه مش عاوز اقول كل يوم لأ .. فريق عمل بيطور نفسه كل ساعة .. حاولنا أن احنا نتحاشى أى خطأ وقعنا فيه واحنا بنصور الفيلم الأول .. واكبر تحدى كان بيواجهنا هو ان احنا كل تصوير الفيلم ده كان شغل خارجى ومشاكل الخارجى أكبر عائق بيقابل أى واحد عاوز يصور .. اولاً أنت مش متحكم فى أى حاجة .. ثانياً وده الاهم ان احنا اصلا معناش إضاءه وكنا بنصور على إضاءه الشارع العادية .. ثالثاً الصوت ودايما بنتلافى المشكله دى بتراك المزيكا اللى بيقرفنا عقبال ما نلاقى تراك مزيكا ماشى مع اللى احنا صورناه .. رابعاً ان الناس كلها بتقف تتفرج عليك وانتا بتصور وتسألك بتعمل إيه وتنيل إيه .. سيبك من ان الناس كانت بتتريق عليا لما كنت بقعد على الأرض عشان أخد المشهد من زاويا معينة كنت حابب اصور منها ..

وبدأت رحلة البحث عن مكان مناسب للتصوير .. ولما كان أحمد العيص كان قد اقترح شارع ضيق بجوار منزله تحرك الجميع ( اللى كانوا كتير أوى اوى خصوصاً ان ناس كتير طلبت انها تشارك فى الفيلم الجاى خصوصاً ان الاول كان اترفع وعجب ناس كتيره! ) .. تحرك الجمع إلى الشارع الجانبى الضيق اللى المفروض انه فاضى ( كان فاضى لغاية لما بدأنا شغل!، كل العيال الصغيرة جت تتفرج وبوابين العمارات طلعوا يشوفوا الهُبل دول بينيلوا إيه؟! )

الجميع الأن يتناقش حول طريقة التصوير والزوايا المقترحة وجلال تقريبا ً كان سيحاول إلتهام شريف لولا وجود الشارنوبى بينهما!

وبدأ التصوير .. الجدير بالذكر ان احمد سامى ( بطل فيلمنا الموقر! ) عاد المشهد ده يجى سبعتاشر تمنتاشر مرة وبرضه فى الأخر معملش اللى الواحد كان عاوزه .. بس بجد كان يوم مسخرة اصلاً .. هو اصلاً كان فى دماغه حاجه تانية خالص غير اللى أحنا كنا عاوزينه! .. كل ما أتفرج على كواليس المشهد ده بالذات واشوف نفسى وانا بزعقله عشان يعيد المشهد أقعد أقول لنفسى " ولااا ، انت هتعيش الدور وصدقت انك مخرج ولا إيه؟! " .. ما علينا .. بس مش عاوز أقلكم ربك كان مسهلها أزاى فى المشهد ده خصوصا ً لما المكوجى دخل فى اول الكادر وهو شايل المكواه الناس كلها أفتكرتنا متفقين معاه لكن والنعمه والنعمه كمان مرة ربنا كان مسهلها معانا اخر تساهيل!

كنت انا وزياد بنحاول نظبط المشهد لأن تقريبا كان سامى قرفنا من كتر الإعادة فى المشهد الاول الإفتتاحى!

طب والله كُنت مستمتع جداً ان الفيلم ده كله كان تصوير خارجى .. اتعلمنا منه كتير اوى خصوصاً فى حوار الإضاءه .. وكمان فى ردودنا على الناس اللى كانت بتسأل وواقفة تتفرج أحنا بنعك إيه .. وخلانا منهتمش بأى حد بيتريق على اللى احنا بنعمله! أحم تحديداً التريقة اللى كانت بتتقال لما كنت ببقى مربع وقاعد على الأرض!

طب أجيب ان الزاويا دى أزاى من غير ما أقعد على الأرض؟!

زياد محاولاً قتلى بعد ان أصابه الملل بسبب كثره أعادة المشاهد!

لا تُرهق نفسك كثيراً بالتفكير! هذه هى الإضاءه التى كُنا سنعمل عليها لو كانت الشوارع مظلمة او شعرنا أن الكادر مضلم ولا حاجة! .. الحمد لله على نعمة قله الأمكانيات! فهى تجعلنا نُبدع حقاً!

كان هذا العمل تحديداً بداية انطلاقتنا وتفاهمنا جميعاً كفريق عمل متكامل يفهم كل منا ما يريده الاخر دون عناء .. أصبحت أثق ثقة عمياء فى الشارنوبى ورسلان فى عملية المونتاج وإضافة التأثيرات التى نريدها ( أدين بالأعتزار لشارنو لانى بصراحة مكنتش واثق انه هيعمل حاجه كده فى الفيلم ده ولو كنت وثقف فيه ساعتها كنا صورناها بطريقة مختلفة كانت هتبين التأثير ده بشكل أفضل ) .. طبعاً الفيلم ده كان بداية وجود كريم الشطلاوى معانا وكان دوره أساسى جدا فى المشهد الأخير ( كان هو اللى ماسك البالطو بتاعه وعمال بيهوى عشان الورقة تطير "عِدنا المشهد ده كتير اوى" )

باقى انكم تشوفوا الشغل اللى احنا عملناه .. بجد مستنى رأيكم!

حينما تتحد كل قوى الطبيعة الشريرة من أجل الا ترى ريم ماجد! - اليوم التامن

2011-06-08T20:05:00.001+02:00

اليوم التامن من حملة التدوين اليومى .. شهر يونيو

ريم ماجد فى ضيافة مجلة كلمتنا
الحوار فى عدد الشهر الجاى
8-6-2011

كان يوماً غريباً بغض النظر عن التفاصيل الدقيقة ولكن فقط ان تبتسم كلما تتذكر اليوم بكل محاولات أتحاد كل القوى الطبيعية الشريرة فى العالم كله لتمنع لحاقى بريم ماجد النهاردة!

بدأ الأمر منذ يومين او اكثر حينما عرفنا ان ريم ستتواجد يوم الأربعاء من الساعه الحاديه عشر إلى الواحده ولعنت حظى لأننى امتلك امتحان من الثانيه عشر ونصف ألى الثانيه والنصف عصراً .. الخلاصة اننى أخذت ادعوا الله ان تزدحم القاهرة وخاصة منطقة المهندسين بحيث تصل متأخرة وتقضى الكثير من الوقت بالأعلى .. جاءت الواحدة والنصف وهاتفت المجلة لكى اعلم امازلت موجودة ام لا .. وكانت الأجابة نعم! بالطبع لا أريد ان اخبركم اننى كُنت فى الثانية وربع أمام باب المجلة لأفاجأ بها فى وجهى بالطبع كدت ان انفجر فيها اننى قطعت كل تلك المسافة بتلك السرعة متنقلاً من ميكروباص لتاكسى عشان أشوفك على باب العمارة؟! إلا ان كل تلك الهواجس تبددت وانا اخبرها بأبتسامة اننى كنت امتلك امتحاناً وللأسف لم استطع لحاق الحوار! فكان أول شىء سألتنى عليه هو الامتحان .. طبعاً انتم تعلمون الاجابة! كانت الاجابة بالطبع " الحمد لله كله تمام! " على الرغم من أنك عاكك عك السنين!

طبعاً حتى يكتمل ذلك اليوم الرائع شهدت حادثة مروعة قاسية ظننت انها ختام ذلك اليوم الغريب ألا ان أنكسار مفتاح الشقة فى الكالون كان ضربة قاسية لمعنوياتى لهذا اليوم!

المشكلة! - اليوم السابع

2011-06-07T16:42:00.001+02:00

اليوم السابع من حملة التدوين اليومى .. شهر يونيو

تكمن المشلكة انك لا تستطيع أن تهاجمه انت اولاً ولا ان تُظهر كل أعماله السوداء امام الاخرين دون ان يهاجمك هو .. وتظل انت طوال صلواتك تتمنى ان يبدأ هو مهاجمتك اولاً او التهكم على ما تقوم به حتى تبدأ انت فى مهاجمته كرد فعل له!، فيقع هو فى الخطأ ويُكيل لك الأنتقادات، فتبتسم أخيراً لأن الفرصة قد واتتك لتبدأ تحطيم العظام!، إلا انك تُفكر قليلاً بأن الاخرين سيتركون ما يفعله هو كالمعتاد ويصُبون لعناتهم عليك لأنك أظهرت عيوبه بعد ان هاجمك!، ولو كنت شجاعاً لأظهرت تلك العيوب دون ان يبدأ هو! .. وهكذا تضع لسانك فى فمك محتفظاً بما كُنت ستقوله تاركاً إياه يكيل لك الضربات فى صمت!

صورة وحدوتة - الصورة الأولى - اليوم السادس

2011-06-06T15:31:00.004+02:00

على الرغم من أنك تعشق فن التصوير الفوتوغرافى إلا انك فى الأصل تكره الذكريات فمابلك بالذكريات الموثقه؟!

اليوم السادس من حملة التدوين اليومى .. شهر يونيو

متى قويت علاقتك بأحمد جلال؟! انت لا تتذكر تحديداً .. كيف بدأ الأمر بينكما فى الحديث حول عالم الأفلام القصيرة؟! أيضا ً انت لا تتذكر! .. فقط انت تتذكر انك فى يوم من الأيام هاتفته ولمدة ثلاث ساعات او اكثر أخذنا نتنقل سيراً على الأقدام ونناقش الأفكار المطروحة والأمكانيات المتوفرة معنا! .. لا تسألنى أيضاً كيف بدأ علاقتى بالجمعية العلمية فى طب طنطا؟! لتصل إلى معرفتك ببعض التفاصيل الدقيقة التى لا يعلمها إلا عدد محدد فى الجمعية! فقط انت تتذكر ان جلال هاتفك ذات يومك ليخبرك انه دخل إلى الجمعية العلمية وعرض فكرة فيلم قصير لمشروع ما فرحبوا بالفكرة وعلينا ان نبدأ العمل!

أنت أيضاً لا تتذكر كيف بدأت صداقتك باحمد العيص واحمد الشريف واحمد سامى؟! كل ما تعرفه ان هؤلاء هم من وقع عليهم الاختيار من قبل احمد جلال لكى يكونوا فريق العمل!

أنت لا تتذكر كيف أنشأنا Committee جديدة فى الجمعية مخصصة للشئون العاطفية! واطلقنا عليها SCOLA إختصارا ً لــ The Standing Committee on Love Affairs .. أنت لا تتذكر كيف كانت تنقلب دوماً إجتماعتنا إلى التحدث دوماً فى الشئون العاطفية لكل منا! .. أصبحنا جميعاً المستشارين العاطفين لبعضنا البعض! كان العيص مستحوذاً على لقب الملك وانتزعته منه لمره واحده ولفتره قصيرة .. والان اللقب ضائع ولا يجد من يحمله!

مازلت تتذكر كيف بدأ جلال فى إعطائك الكثير من اللينكات التى تتحدث عن مرض الإيدز وقصص حقيقية لبشر تغلبوا على الإيدز لعلنا نستخلص فكرة ما ..

شهر كامل بدأنا فيه الإعداد لنستخلص مجموعة من الأفكار، حتى جاء يوم التصوير ..

الجميع خائف، لا ندرى من أين نبدأ ولا كيف نبدأ؟!

هل الإضاءه جيده؟! لا احد يعرف .. طب زوايا الكاميرا مظبوطه؟! محدش عارف!

أربعة أيام كاملة او اكثر فى عمل المونتاج لما قمنا بتصويره! محمد الشارنوبى واحمد رسلان يبدعان فى عملية المونتاج ولكن جميعاً نستشعر بان هناك خطأ ما! .. هناك شىء ناقص!

أنتهينا من كل شىء .. جعلنا العديد ممن نعرفهم يشاهدون ما قمنا به .. ردود الأفعال كانت صادمة لنا! الجميع منبهر! وحدنا فقط كنا نجلد انفسنا على الكثير من الأخطاء التى وقعنا فيها .. جاء يوم المهرجان المقام من اجل الاحتفال باليوم العالمى لمكافحة الإيدز وعُرض العمل واحتفلنا مع الاخرين بنجاحنا ..

وبراءه الأطفال فى عينيه! - اليوم الخامس

2011-06-05T15:08:00.001+02:00

اليوم الخامس من حملة التدوين اليومى .. شهر يونيو

لم أتفهم حتى الان لماذا لم تكن تلك الصورة التى بالأعلى بالألوان!، أخبرونى ان تلك الصورة كانت صورة رسمية حتى تُضيفنى والدتى على إقامتها ولم أتفهم أيضاً لماذا كانت الصورة أبيض وأسود!

فجأه سألتنى والدتى : " هو انتا لسه بتقابل صحابك اللى كانوا معاك فى تمهيدى وإبتدائى؟! " بالطبع كانت الإجابة هى " نعم! " .. من حين لأخر أُخرج تلك الصور وأبحث عن هؤلاء الذين سقطوا من ذاكرتى وأبدأ رحلة البحث فى غياهب الذاكرة عن تلك الأسماء وأبدأ بالسؤال عليهم ومحاولة الوصل إليهم .. وفى بعض الأحيان أصل وأحياناً كثيرة لا اجد أى معلومات!

تبقى تلك الصداقات القديمة وهؤلاء الأشخاص الذين تعرفتهم فى مرحلة عمرية لم تكن تعى فيها أى من تلك الخصال السيئة كالنفاق والكذب والغش والخداع هى أفضل الصداقات وانقاها واطهرها .. فقد كُنا اطفال حين ذاك .. وكانت براءه الأطفال فى عيوننا جميعا ً ..

مصر بين الدولة الإسلامية والدولة الليبرالية - ما بعد الثورة - اليوم الرابع

2011-06-04T20:50:00.004+02:00

اليوم الرابع من حملة التدوين اليومى .. شهر يونيو

" محمود ميسرة .. عمر صفا "

" مصر بين الدولة الإسلامية والدولة الليبرالية "، كان هذا هو عنوان الحوار الطلابى الاول المُنظم من قبل اللجنة الثقافية لإتحاد طلاب طب طنطا المُنتخب بحضور الدكتور احمد الجندى كمنظم للحوار بين الطرفين وليس طرفاً فيه، وعمر هشام صفا كممثل للأتجاه الليبرالى ومحمود ميسرة ممثلاً للأتجاه الأسلامى، ولم اعرف حتى الان الأُسس التى أُختير على أساسها الطرفين!

قام محمد صلاح أبو قاسم بالترحيب بالحضور فى البداية موضحاً عنوان الحوار " مصر بين الدولة الإسلامية والدولة الليبرالية " وموضحاً ان كلا الطرفين سيتحدث شارحاً التوجه الفكرى الذى تبناه كل منهم بحد أقصى 15 دقيقة لكل منهما على أن يبدأ الحضور بعدها بالسؤال فى مدة لا تتجاوز 5 دقائق لكل فرد!

بدأ الحوار بطرح وجهه النظر الليبرالية للدولة المصرية وبدأ معها عمر صفا فى طرح وجهه النظر الليبرالية وبدأ بوجهه النظر الليبرالية فى السياسة وخصوصاً حول فصل الدين عن الدولة مؤكداً ان الليبرالية تؤمن بأن رجال الدين محصورين بكونهم افراد فى اختياراتهم السياسة فلا يجب على رجل الدين ان يتحدث فى السياسة من منطلق الدين وانما يتحدث فى السياسة بوصفه فرداً ليس إلا! مؤكداً عبر كلامه على ان الليبرالية تختلف اختلافاً شاسعاً عن الديموقراطية .. فالليبرالية هى من تحكم الديموقراطية مؤكداً على ان الليبرالية تتدخل فى بعض الأحيان لتمنع الأختيار الديموقراطى ان كان هذا يتعارض مع الحرية! بمعنى ان الليبرالية تتدخل هنا فى حالة حدوث انتهاك ما لحرية الفرد او الأقليات حتى وان كان هذا باختيار ديموقراطى للأغلبية! موضحاً ان الليبرالية قائمة على حرية الفرد فى الأساس وان الفرد لديها هو الأساس.

تطرق عمر بعدها إلى تاريخ الليبرالية فى مصر والتى كانت متمثلة قديماً فى بدايات القرن العشرين فى حزب الوفد القديم معبراً عن وجهه نظره الخاصة بانه لا توجد ليبرالية فى مصر منذ عام 52 تطرق بعدها عمر لشرح الأقتصاد فى الليبرالية والذى كان يعطى قديماً الحق للدولة فقط فى المراقبة على الأقتصاد وادى هذا لحدوث الكثير من الأحتكارات والممارسات التجارية التى ادت إلى وجود فجوات طبقية أدى ذلك إلى تقويم الليبرالية فيما بعد لإعطاء الدولة الحق فى التدخل لظبط الممارسات التجارية والمحافظة على المستوى المعيشى للفرد لأن الدولة الليبرالية تقوم فى الأصل على مبدأ الفرد هو الأساس.

انهى عمر كلامه بانه هناك اكثر من توجه لليبرالية إلا انهم جميعاً يتفقون فى اكثر من نقطة اهمهم :

1- حقوق الانسان بوجه عام ( ولا يحق للأغلبية أى كان موقفها ان تتدخل! )

2- الدولة الليبرالية هى دولة القانون ( فالجميع سواسية امام القانون ولا يحق لأحد ان يُهدر دم احد، فالكلمة العليا هى للقانون )

3- الدولة الليبرالية هى دولة ديموقراطية

4- الشعب هو المصدر الوحيد والاوحد للسلطة

واخيرا ً اكد عمر على ان الليبرالية لا تقول " فصل الدين عن السياسة " وإنما تقول " دمج المرجعية الدينية مع المرجعية المدنية " وانه فى الدولة الليبرالية لا وجود لما يُعرف بـ ( الدين بيقول كذا ) وإنما كل منا حُر فى أختيار عقيدته وحر فى إلتزامه بها فـالليبرالية ليس لها مرجع مقدس وتتطور حسب المجتمع وتعظم من شئن أختيار الفرد مادام لا يتعارض مع عادات وتقاليد المجتمع.

تسلم بعدها محمود ميسرة دفة الحوار ليبدأ كما هو مخطط له فى طرح وجهه نظر الدولة المصرية من منظور إسلامى إلا ان محمود ميسرة فاجأ الجميع ولمدة زادت عن عشر دقائق فى طرح نقده للمفهوم الليبرالى موضحاً ان الليبرالية نشأت من اجل خدمة هدف إقتصادى بحت مدعومة بالسياسات الامريكية والأقتصاد الأمريكى! مما جعل البعض يهمهم بكلمات غاضبة وعبارات من طراز " هو هيتكلم عن الليبرالية ولا إيه؟! " و " هوا مش المفروض هيتكلم عن وجهه النظر الإسلامية ولا أحنا قرينا الإيفنت غلط؟! " _ أوضح محمود ميسرة فى الجزء الاخير من الندوة انه بدأ عمداً بإنتقاد الليبرالية ليوضح انها أصلاً فكرة هُلامية غير موجودة! _ وبعد ان تعالت همهمات الحضور بسبب بُعد محمود ميسرة عن ما كان مُعلن بحديثه عن الطرح الإسلامى للدولة المصرية بدأ محمود ميسرة فى التحدث عن الدولة الإسلامية فى مدة لم تزيد عن خمس دقائق وبالطبع لم تكن تلك مدة كافية لطرح أى شىء عن الدولة المصرية من وجهه نظر إسلامية!

ليبدأ بعدها الفقرة المخصصة للحضور بعد ان طرح كلا الطرفين وجهه نظرهما فى الدولة المصرية من منظورين مختلفين والتى تفاجأ الجميع _ بما فيهم انا _ بأن الامر مقصور على من حضروا باكراً وكتبوا اسمائهم فى ورقة!

كُنت كغيرى أظن ان ذلك حوار لعرض الفكرتين وبعد ذلك هناك فرصة للحضور لإلقاء الأسئلة من اجل توضيح الفكرتين اكثر او حتى من أجل طرح أسئلة فى مجالات معينة لأحد المنظورين وعلى متنبى المنظور الليبرالى أو الأسلامى الأجابة عليها إلا ان الامر تحول فجأه من حوار إلى مناظرة وياليت الامر توقف عند ذلك الحد بل خرج الجميع ليتحدثون طوال الخمس دقائق المخصصة لهم عن وجهه نظرهم الشخصية فى الليبرالية ومعارضتها أو وجهه نظرهم الشخصية فى النظام والدولة الإسلامية ومعارضتهم لتلك الفكرة وكأن الجميع كان ينتظر أى فرصة تتاح له امام أى جمع من البشر ليلقى عليهم وجهات نظره العميقة والسديدة!، بل وصل الأمر بالبعض إلى التطرق إلى نقاط بعيدة تماماً عن لُب الموضوع والنقاش!

كما ان البعض حاول تعويض غياب طرح محمود ميسرة للدولة الأسلامية بإضاعته لوقته المخصص بإنتقاده لليبرالية ولكن بالطبع فرصة الخمس دقائق لكل متحدث لطرح الأسئلة لم تكن كافية ليعرض وجهه النظر الأسلامية ورؤيتها للدولة الإسلامية ..

ربما اهم ما طُرح من جانب الحضور _ والذى كان اغلبة ينتمى إلى الفكر المؤيد لإقامة الدولة الإسلامية ومعارضاُ بشده للدولة الليبرالية _ هو :

1-" هو ان فى الأصل جوهر قيام الدولة الإسلامية يختلف عن جوهر الدولة الليبرالية والتى تقوم فى الأساس على الفرد "

2- " الليبرالية قائمة على مبدأ الحرية ولكن أليس للحرية حدود؟!، وبخصوص انك حُر مالم تضر، أليس الضرر نسبى؟! "

3- أن مصطلح الإسلامين هو مصطلح إعلامى فقط لوصف الجماعات السلفية والاخوان المسلمين!

4- " هناك فرق جوهرى ما بين الدولة الإسلامية والدولة الليبرالية! فالدولة الأسلامية مهمتها إقامة دين فى حياه الأفراد للسعادة فى الدار الأخره والتى يترتب عليها سعادة دونياوية بينما الدولة الليبرالية قائمة على سعادة الفرد الدنياوية وبالتالى فأنه لا يوجد اى وجه شبه ما بين الليبرالية والإسلام! "

5- " ماهو رد الدولة الليبرالية المصرية أن أصبحت مصر دولة ليبرالية حول قضية المسلمين فى الشيشان مثلاً ؟! " ( تقريبا واحد من ضمن الأسئلة القليلة التى وجهت لتبين وجه إختلاف ما بين الدولة الأسلامية والدولة الليبرالية فى تعاملها مع المسلمين فى دولة مصرية أغلبها مسلمين، اى هل ستهتم الحكومة التى اغلبها مسلمين بالمسلمين حول العالم ام لا؟! .. سؤال اراه فى صلب الحوار )

6- " الدولة هى اختراع بشرى قبل وجود الإسلام وبعد وجوده، فالدولة مهمتها تصريف امور البشر وليس أخذهم إلى الجنة! "

7- " الأسلام امر بالنهى عن المنكر والامر بالمعروف ومن واجبى لكى انهى عن المنكر ان اخرج عن الحاكم وأولى الامر أن أنحرفوا عن مسارهم، هذا رداً على بعض الليبرالين الذين يتحججون بأن الأسلام يأمر بعدم الخروج عن الحاكم، مبدأ عدم الخروج عن الحاكم هو احد مبادىء السلف القديم والذى لا يتماشى مع المجتمع الأن مع الاعتزار للأخوه السلف "

8- " شكل الدولة يتغير بمرور الزمن، لذلك نحن نظلم الدين إن قلنا انه وضع تصورا ً ثابتاً للدولة، فالدين هو مجموعة من الاخلاقيات للأسس ما بينك وما بين الأفراد والمجتمع وربنا "

9- " إن كانت الدولة الليبرالية هى دولة القانون، فالدولة الإسلامية دولة دستورها وقانونها هو القرآن والسنة "

أجاب بعد ذلك عمر عن جزء كبير من الأسئلة مطعماً بمقاطعات كثيرة جدا ً للغاية ولم يسعفه الوقت المخصص له بالرد على كل الأسئلة التى وجهت له وأعتقد انه ربما سيجيب تلك الأسئلة كلها وينشرها على الفيس بوك فى نوت خاص بذلك وقام محمود فى الجزء الخاص له اخيراً للتعقيب بتوضيح أنه بدأ عمداً بانتقاد الليبرالية ليوضح انها شىء هلامى لا وجود له ..

واختتم الدكتور احمد الجندى الحوار بفرحه الشديد نتيجة خروج هذا الحوار بهذا الشكل اللائق!

تعليقى الشخصى على الندوة او الحوار او المناظرة _ اى كانت! _ وبالمناسبة يمكنك الإكتفاء بما قرأت فى الاعلى وتجاوز ذلك الجزء!

1- لم يكن محمود ميسرة موفقاً على الأطلاق فى طرحه كان الاولى مادام يرى ان الليبرالية شىء هلامى لاوجود له ان يعتذر عن ذلك الحوار وربما لكان اتاح الفرصة لغيره فى إستعراض مميزات النظام الإسلامى السياسى والإقتصادى وتعامل الأسلام مع الفرد وتكريمه له بدلا ً من ان يقوم الحضور هم انفسهم بتوضيح وجهات النظر تلك فى مدة لا تزيد عن خمس دقائق والتى هى بالتاكيد لم تكن كافية لطرح وجهه نظر وعرض للدولة الإسلامية ككل ..

2- وقع ميسرة فى نفس المشكلة التى يقع فيها أغلب الدعاه إلى الدولة الإسلامية وأصحاب الفكر الإسلامى وهى الإفتقار إلى الطرح الإعلامى الجيد فى حين ان الاخرين يتمتعون بميزة الطرح الإعلامى الجيد وهذا هو ما يهيج دوماً الرأى العام ضدهم، على الرغم من ان محمود يتمتع برقى فى كتاباته التى يمكنكم مطالعتها من هنا كتابات محمود ميسرة سالم ولكن بالرغم من هذا كان غير موفق على الإطلاق فى طرحه ..

3- لم اتفهم حقيقة ان من يأتى باكراً ويكتب اسمه فى الورقه هو من لديه الحق فى الكلام! بإختصار أى ان الجميع قادم وهو مجهز ما سيقوله بغض النظر عن أى حوار سيتم طرحه! " حافظ مش فاهم يعنى! " ..

4- هل تتذكرون حينما كانوا يخبروننا فى حصص التعبير بانه يجب علينا فى بداية كتابة موضوع التعبير الإستشهاد اولا بالأيات القرآنية وبعد ذلك الاحاديث النبوية ومن بعدها الحكم والمقولات الماثورة وبعد ذلك الدخول إلى الموضوع!، هذا تقريبا ً ما كان يحدث وحينما انتقد احدهم بداية كل متحدث بالكثير من الأيات القرآنية والأحاديث النبوية رد اخر بان هذه هى هويتنا وهذا هو ديننا .. غير مُدرك ان الليبرالية ليس لها مرجعية دينية وعنوان الحوار هو " مصر بين الدولة الإسلامية والدولة الليبرالية " أى أن الخطاب من المفترض أن يكون عقليا ً بحتا ً .. فماذا يُفيد غير المسلم مثلاً ان تستشهد بالقرآن والسنة فى هدايته وهو لا يؤمن بالقرآن والسنة من الأساس؟!

5- مازال البعض يعتقد ان التيار الفكرى الإسلامى منحصر ما بين الجماعات السلفية والأخوان المسلمين! وتقريباُ اشار احدهم ان محمود ميسرة ينتمى إلى جماعة الاخوان المسلمين بينما هو لا ينتمى إلى الاخوان المسلمين او السلف وحينها عاجله أحدهم " امال انتا بتعمل ايه هنا؟! " .. اى انه مازال البعض غير مؤمن بانه لا يجب ان تنتمى إلى الاخوان المسلمين او السلفين حتى تعتنق الفكر والمذهب الإسلامى ..

أن محصلة أى ليبرالى هى صفر بالتأكيد حيث ان الحوار هذا لم يُقدم له طرحاً للدولة الإسلامية على الأطلاق، ام محصلة الإسلامين لم تزد او تنقص لان الأغلبية جاءت وهى تعلم جيداً اى الامور ستناقش وأيها ستعارض وأيها ستقبل ..

كما ان الجميع فما فيهم من كان مؤمن بالتوجه الأسلامى للدولة المصرية أو التوجه الليبرالى للدولة المصرية خرج علينا فى خمس دقائق كاملاً ليطرح وجهه نظره الخاصة فى الموضوع او حتى خارج الموضوع بدلا ً من السؤال وتوجيه الأسئلة التى توضح حقيقة وجوهر الإختلاف مابين الدولة الإسلامية والدولة الليبرالية ..

أختتم بمقولتين أراهما هم الأفضل لذلك اليوم ..

المقولة الاولى للصديق العزيز محمد يسرى :

" الذي يجعل الإسلام - كأسلوب لتنظيم العلاقة بين البشر - صالحا في القرن الأول الهجري وصالحا في هذا الوقت هو المرونة والاتساع التي وهبها الله له، فمن يقول أن تطبيق الإسلام غير صالح الآن فهو جاهل بالإسلام لأنه جاهل بهذه المرونة ومن يقول أن تطبيق الإسلام الآن هو بنفس شكل القرن الهجري الأول فهو أيضا جاهل بالإسلام لأنه جاهل بهذه المرونة أيضا "

والمقولة الثانية التى قد تُغضب الكثير من الليبرالين هى لشخص لا أذكر اسمه للأسف :

" إن احدى الأختلافات الجوهرية ما بين الأسلام والليبرالية هى أن الأسلام فيه تكامل ما بين الليبرالية والأقلية بينما الليبرالية خلقت صراعاً ما بين الأغلبية والأقلية "

بالشقلوب! - اليوم التالت

2011-06-03T11:43:00.002+02:00

اليوم التالت من حملة التدوين اليومى .. شهر يونيو

قد يراها البعض تفاهات وقد يراها البعض الاخر تفاهات برضه! ولكنك وحدك تعلم ان حياتك لن تستقيم بدونها!

عارف أنتا لما فجأه يجى واحد شحات متبهدل وحالته بالبلا ويجى يقولك " والنبى يا بيه هات جنيه،جعان وعاوز أكل " فتقوم واخده وشاريله كيس شبسى وكان بيبسى وتديهمله وانتا مبسوط وهو مستغرب!

عارف انتا برضه لما يجيلك واحد شحات تقوم مديله خمسين جنيه فى أيده!، وتبسط اوى لما تشوف نظرة الإذبهلال فى عينه وهو مش مصدق! صدقنى نظره الإذبهلال اللى بتبقى على وشه دى تسوى خمسين جنيه! " أنا فى مرة ست رجعتلى الخمسين جنيه وقالتلى : شكل حضرتك غلط دى خمسين جنيه؟! "

عارف انتا لما تبقى مخنوق فتقوم طالع ع الموقف وراكب عربية رايحة سمنود وتنزل هناك وتقعد تخبط وتتمشى وفى الأخر تسأل على الموقف وتقوم راكب وراجع وانتا أصلا عمرك ما روحت سمنود دى ولا تعرف حتى سمنود دى تبع محافظة إيه؟!

عارف انتا لما تبقى الساعة إحداشر بليل وماشى مع اتنين صحابك فى الشارع وفجأه تفتكر أغانى محمد فؤاد القديمة اللى كان كلها اطفال وكانت كل الأغانى بتتكلم عن الحب وهوب تضحكوا بصوت عالى وبعد كده بصوتك النشاز تبدأ تغنى وصوتك يعلى اكتر واكتر والناس تبصلك فى الشارع بإذبهلال والعيال صحابك يقولولك " أسكت،فضحتنا! "

عارف انتا برضه لما فجأه تسمع مزيكا جميلة أو اغنية وانتا ماشى فى الشارع فتقوم ماسك صاحبك من إيده وتقعدوا ترقصوا فى الشارع وتضحكوا والناس تبصلكم وتستغرب وتلاقى راجل كبير فى السن معدى من جمبكم وعمال يقول " لا حول ولا قوة إلا بالله، قله أدب! "

عارف انتا لما كل الناس تكلمك عن مكان موجود فيه كُتب بأسعار زهيدة وان المكان ده كنز فتقوم لامم فلوسك كلها ورايح هناك وتقلب فى الكتب وتلاقى كنوز بجد زى ما هما قلولك فتقوم سايب ده كله وفى الأخر تشترى بمبلغ محترم أعداد كتيرة اوى من ميكى وبطوط!

عارف انتا برضه لما كل الناس تتريق عليك لأنك عمال تتفرج على سابق ولاحق والمحقق كونان وكابتن ماجد وأبطال الديجيتال وعمال بدور على الحاجات دى على النت وتنزلها عشان تتفرج عليها! أحم، والمغامرون الخمسة كمان!

عارف انتا لما تيجى تدفع فاتورة التليفون فتلاقى طبور طويل عريض فتقوم تيجى فى بالك فكرة مجنونة وتلاقى باب الأدارة مفتوح ولسه واحد شغال هناك بيقول لواحد " مع السلامة يا دكتور،أنست وشرفت والله " فتقوم داخل ورايح للراجل ده وقارى الأسم اللى محطوط قدامه على المكتب وتقوله " مش حضرتك برضه فلان الفلانى؟! " يقولك " أيوه يا حبيبى " تقوم قايله " بابا كان كلم حضرتك، ادى النمرة وأدى الفلوس! " فيخلصلك الفاتورة!

كان فى مرة صحاب،كان فى مرة ثورة! - اليوم التانى

2011-06-02T11:29:00.001+02:00

اليوم التانى من حملة التدوين اليومى .. شهر يونيو

11.02.2011, 07:00 p.m
"بعد خطاب سليمان بتنحى مبارك"
اللحظة الأكثر سعادة .. اللحظة التى لن ننساها أبدا

بعد ما الريس تنحى يوم 11 فبراير، كان دايما السؤال اللى كل الناس عماله تسأله لبعضها "ها، قولى أستفدت إيه بقى من الثورة دى واتعلمت منها إيه؟!" ناس كتير اوى كانت بتقول "ان احنا منسكتش على الظلم تانى" و "اتعلمنا إن البلد دى بتاعتنا" و "عرفنا ان ربنا ما بيسبش ظالم ابدا ً" كانت أجابتى دايما ً بتخلى الناس تستغرب لما كنت بقولهم أن الحاجة الوحيدة اللى استفدتها من الثورة هيا "الصحاب" أه والنعمة الصحاب.

طول عمرى لما حد كان بيسألنى عن مفهومى للصداقة والصُحوبية كنت بقول له : "هى عبارة عن علاقة ما بين شخصين أو اكتر قايمة على التبادل المنفعى!" طبعا اول لما حد كان بيسمع منى كلمة "منفعى" دى كان بيقوم ومايقعدش أو يقعد يسب ويلعن فى الجيل بتاعنا اللى خلى كل حاجة عبارة عن منفعة وعمر ما حد أدانى الفرصة اكمل واشرج يعنى أيه منفعة!

عارف انتا لما تبقى مصاحب حد عشان بتبقى مبسوط معاه، عارف لما تحب حد قوى ويبقى صديق مقرب لأنك بتستمع بمناقشته فكريا ً، هى دى بقى المنفعة اللى انا أقصدها!

انا خلصت امتحاناتى يوم 22 يناير ولسه صحابى قدامهم لغاية يوم 27 يناير عشان يخلصوا وبالتالى لو نزلت يوم 25 يناير هنزل لوحدى، لكن شوية مكالمات من هنا على مكالمات من هناك أتفقت مع مجموعة ان احنا ننزل سوا، وبدأ اللى يعرف حد يعرف التانين، وبدأنا يوم 25 يناير الساعة 12 الظهر من امام مبنى محافظة الغربية اعمق واغرب قصة صداقة نشأت بين مجموعة من الشباب، قصة صداقة فى حب مصر وبس.

ويوم جمعة الغضب اتعرفت على محمد رجائى واخته امنية ومكنتش اتخيل انه هيبقى صديق شخصى بعد كده ومكنتش متخيل انه هيقضى اليوم ده كله معايا.

وبدأت المظاهرات وقابلت ريهام اللى كانت علاقتنا عبارة عن شغل فى الأغلب بس مكنتش العلاقة قوية أوى بس يومها قويت وانا وهي مشكلين جبهة إسعاف داخلية للمتظاهرين اللى بيقعوا نتيجة الغاز المسيل للدموع.

بقعد افتكر ساعة لما الضرب وقف ورجعنا ورا خالص وقعدنا نغنى اغانى سيد درويش والشيخ امام ونضحك ونقول "ياترى هنعملها بجد ولا إيه؟" ونبدأ نحلل ونتشائم ونفرح ونتفائل مع بعض!

كانت لحظات نادرة جدا ً من لحظات الصداقة الحقيقية والضحك والأبتسام الصافى النابع من القلب والخالى من أى احقاد على الرغم من احنا منعرفش بعض بصورة شخصية إلا يمكن من ساعات قليلة بس!

بجد يا ريس يا مخلوع متشكر قوى قوى انك عاند معانا 18 يوم خلتنى اعيد أكتشاف صداقتى بصحابى واعرف فيهم مين اللى راجل بجد ومين اللى اى كلام وشكرا ً لانك خلتنى اعيد أكتشاف معنى الصداقة مره اخرى .. شكرا ً ياريس يا مخلوع انك خليت اجابة سؤلنا اليومى "هوا احنا هنقدر نعملها؟" ، "أيو قدرنا نعملها" ..

الموت! - اليوم الأول

2011-06-01T12:45:00.001+02:00

اليوم الأول من حملة التدوين اليومى .. شهر يونيو

{ أَيْنَمَا تَكُونُواْ يُدْرِككُّمُ الْمَوْتُ وَلَوْ كُنتُمْ فِي بُرُوجٍ مُّشَيَّدَةٍ } "سورة النساء، الأيه 78"

كاذب هو ومخادع ذلك الذى يخبرك أنه لا يخشى الموت! صدقنى ذلك الذى يُخبرك بانه لا يخشى الموت هو اول من يرتجف خوفا ً وهلعا ً أن شم رائحة الموت!

فى أيام سفرى الطويلة التى لا تنتهى اشاهد ما بين ثلاث او أربع حوادث على الطرق يوميا ً وهو معدل طبيعى للحوادث على الطريق ألا انه صدق او لا تُصدق يؤثر على نفسيا ً بطريقة بشعة تدفعك إلى الصياح فى وجوهم حينما تُبدى بعض التهجم على وجهك أثناء الغدا! فتصيح بهم انك أصطبحت النهاردة على حادثتين زى الفل وقفلت يومك بواحدة برضه الراجل كان جوه العربية والدم مغرق الدنيا والأسعاف كانت لسه واصله!

مع بداية تلك السنة العجيبة ومنذ تفجير الكنيسة فى أول أيام السنة كُنت واثقا ً ان تلك السنة ستحمل لنا الكثير والكثير جدا ً .. وبالطبع لم يمضى أسبوعان على تلك السنة الجديدة إلا وكُنا على قيد أُنملة من موت محقق!

يمكنك قراءه التفاصيل بالطبع من هنا او مقالة جلال من هنا !

كان الأمر ليمر مرور الكرام لولا تكرار البعض فى إصرار أنهم تعجبوا من رده فعلى!

فلقد كُنت سعيدا ً للغاية ومتفائلا ً على الرغم من كل هذا! الحقيقة اننى بالفعل كُنت سعيدا ً لأننا نجونا من هذا ببساطة لأننى كُنت غير مستعد بالمرة!

بعد تلك الحادثة تحديدا ً أصبحت اتعامل مع الموت ببرود شديد وبهدوء أعصاب .. بالطبع أنا مرعوب من تلك اللحظة التى أموت فيها ليبدأ الحساب .. دعونى اعترف ولأكن صريحا ً معكم لست مستعد لتلك اللحظة!

لم اعرف لماذا كُنت انا اول المُضحين بالركوب مع عمر على الرغم ان هذه هى المرة الاولى التى يقود فيها السيارة بمفرده! دعكم من ان عمر متهور! ولكنه الشعور بالشفقة تجاهه خصوصا ً حينما اعطاه الأخرين شعور بعدم الثقة واتجهوا جميعا ً إلى سيارة إسلام مكدسين انفسهم فيها! كُنت أول المتطوعين ومن لم تتسع له السيارة الأخرى إضطر أسفا ً ان يركب معنا!

كُنت هادئا ً بالطبع بجوار عمر! .. "هدى يا عمر!،طيب سيبه يعدى يا حببيبى!،خش يمين،أحدف شمال!،حاسب المطب!براااااحه يا عمر!"

بالطبع تُصبح اللحظة الحاسمة دوما ً حينما يعطى أثنان امران مختلفان لقائد السيارة خصوصا ً لو كُنا على طريق سريع إضاءته زى الزفت وفى ملف وسيارة نصف نقل مسرعه تأتى من بعيد وقائد السيرة أول مرة يسوق لوحده!

وأخطأ على فى تقدير سرعة السيارة بينما انا اخبر عمر بإنتظار عبور السيارة إلا ان على اخبره أن يتقدم وبالطبع بين تضارب الأمرين فجأة توقف عمر فى منتصف الطريق!

أضواء السيارة قادمة من بعيد مسرعة .. صوت بيب بيب بيب بيب يصم الأذان! هى النهاية إذاً!

لم أفهم ما حدث بعد ذلك ولكن كل ما اعرفه ان عمر ضغط دواسة البنزين قبل لحظات من الإصطدام ربما ليقف على جانب الطريق سائلا ً إيانا "حسيتوا بإيه؟!" صدقونى وددت حينها ان ارتكب افعالا ً شنيعة مع عمر ولكن فكرت فى السؤال وأكتشفت أن الفكرة الوحيدة التى سيطرت على هى "كويس ان إسلام ورانا وبالتالى هيلحقونا، ينقلونا المستشفى،يكلموا اهلينا!" .. بأختصار وللمرة الثانية فى هذا العام تعاملت ببرود شديد جدا ً مع الموت ربما لأننى بالفعل غير مستعد!

تذكرت كل تلك الأشياء لأنه منذ يومان أو اكثر تحولت كل صور البروفيلات لمن اعرفهم إلى صورة سوداء او صور أشخاص مع عبارات "ربنا يرحمك يا ميدو" والحقيقة أننى لا اعرف اى منهم ولكنهم من طنطا وحينما سالت أكتشفت انهم ثلاثة شباب توفوا فى حادثة سيارة .. كان الامر بالتأكيد مقززا ً لى وانا أرى كل تلك الصفحات من طراز "هنفضل فاكرينك يا ميدو"،"ربنا يرحمك يا ميدو" .. ألا لعنة الله لتحل على الفيس بوك ؟! وحينما أصطدمت ببروفيل احدهم وجدت الوول الخاصة به متاحه لغير الأصدقاء وبتصفحها طبعا هناك الكثير من "وحشتنى!"،"وربنا يرحمك ويسكنك فسيح جناته" وكأنه سيقرأ تلك الكلمات! لدينا جميعا حب الظهور ولكن لنتوقف قليلا ً عن حب الظهور ذلك خاصة فى لحظات الموت المقدسة! .. فقط كان الامر مستفزا ً حينما وجدت احدهم واضعا لينك لاحد الصفحات التى انشأها من أجل الفقيد على بروفيل الفقيد! ألا لعنة الله لتحل على الفيس بوك ؟!

فليرحمهم الله ويسكنهم فسيح جناته ولتتوقف نفوسكم البشرية عن محاولة حب الظهور بمظهر المتدين الورعين التقاه امام الأخرين .. فلتدعوا لهم فى صمت وهدوء وقنوت ..

ورجاء خاص يوم ان اموت لا داعى على الإطلاق لكى تُزينون صور بروفيلاتكم بصورتى مصحوبة بالشريط الأسود أو ان تقومون بعمل صفحات لنعى او حتى تكتبون على الوول الخاص بى نعياً "من الرائع اننى أغلقت تلك الخاصية عندى منذ سنة فلن يستطيع احد ان يكتب نعى على بروفيلى وانا ميت!" وارجوا ألا يستظرف احدكم ليُرسل لى مسدج فصدقنى انا لن أستطيع قراءتها! فقط أدعى لى حينها وأقرأ لى ما تسير من القرآن دون ضجيج او دعاية على الفيس بوك!

بعد خمسة سنوات، لقد فشلت الخطة! - القصقوصة التلاتة وتسعين

2011-05-27T11:22:00.002+02:00

مُرعبة هى تلك المسدجات الفيسبوكية القديمة التى تجعلك تتوقف عما تفعله وتقرأ كل تلك المسدجات من ثلاثة اعوام كاملة! تستشعر نفس المشاعر وانت تُعيد القرأة! تبكى وتفرح وتحزن وتحب وتكره .. مشاعر متضاربه كانت هى! فقط تنتهى من كل هذا لتسحب سكرين شوت وترسله إلى ذلك الشخص مع أبتسامه وشكر لأنه كان موجود ذات يوم! وتستلقى بعدها على سريرك وتنظر إلى السقف مبحلقاً تتذكر حياتك مع ذلك الشخص طوال تلك السنين الماضية لم تسر حسب ما خططت لها منذ اول يوم! تنتبه فجأه إلى انك بالفعل كنت تمتلك خطة طويلة الامد! تتذكر وانت فى الصف الثالث الأعدادى حينما وضعت لنفسك تلك الخطة والتى كنت تقوم بتحديثها كل فترة بالمستجدات وبالطموحات الجديدة!

انها الخطة التى كُتبت على ورقة لم يطلع عليها أحد حتى الأن .. كنت قد خططت بأن تضع علامة صح مع كل جزء يُنفذ من الخطة والأن تذكرت تلك الورقة لأخرجها لأكتشف أن الشىء الوحيد التى وضعت عليه علامة صح كان هو " أحب واحده بجد " المصيبة انها لم تكن علامة صح واحده بل كانت أكثر من علامة صح مشطوب عليها! بالطبع وقعت عينى على ذلك الجزء " البنت اللى هحبها هتبقى أول حب فى حياتى بعيدا عن جو المراهقين وهيا دى اللى هحبها حب كبير وهى دى اللى هتجوزها عشان انا عاوز اللى اتجوزها تكون اول حب فى حياتى " أنتابتنى نوبة ضحك هيسترية عندما قرأت ذلك الجزء .. المشكلة أننى وضعت خطتى على أساس وهم المثالية! تلك المثالية التى كُنت أطمح لها ولم اقترب حتى قيد أُنملة منها!

حاول كثيرين ان يقنعونى أنه لا بأس ان تقع فى الحب مرة ومرات عديدة وتحب وتعشق وينتهى ذلك الحب وتحاول مرة أخرى وتعشق وتحب! ولكن عقلى أخذ يرفض ذلك طوال الوقت ربما لأننا نشأنا على أن الحب حاجة عيب ولازم نخبيها ونداريها على الرغم من أن الحب هو شىء على النقيض تماما ً!

مازلت أتذكر اننى قبل ألتقاط الصورة التى بالأعلى بأيام قليلة كُنت أخطط مع بعض الأصدقاء كيف سأخبرها وكيف ستعلم هى وبعد ألتقاط تلك الصورة بيومين لا أكثر كتبت أحدى قصصى القصيرة الفاشلة حول أرسال أحدهم مسدج لأحداهن ليخبرها انه يحبها لم أتفهم لماذا أيقن الجميع أننى فعلت ذلك رغم أننى كتبت تنويها وبخط كبير ان كل هذا من وحى خيالى ولكن يبدو اننى غير بارع فى الخداع! الغريب فى الامر أنهم جميعا ً تعاملوا معى على انها من كنا نخطط لأخبارها قبلها بأيام .. لا داعى لأخبركم بكم الشتائم التى تلقيتها والضرب المبرح حينما اخبرتهم بأنها ليست هى بل كانت هى الأخرى! تقريبا ً جاء للجميع شلل فكرى نتيجة ذلك التخبط التى أعانى منه والذى فعلته .. ولكننى اجبت بثقة عجيبة ( معرفش،كان لازم تعرف وهو انا هضحك على نفسى كتير ولا أيه ما انتوا عارفين انى لسه متنيل بحبها " احم حاليا ً ممكن تضيف بدل كلمة لسه كلمه كُنت! " ) .. المهم انه طوال ساعتين كاملتين حاولوا التعامل مع الوضع الجديد ووضع الخطط والتأمينات والتحصينات اللازمة كما انهم كانوا يشكون فى سلامة قواى العقلية فى تلك اللحظات .. تقريبا ً كان يبدوا على وجهى الإذبهلال فى تلك الفترة مما فعلت!

أضعت أكثر من خمس سنوات منذ ان وضعت الخطة فى نقطة واحدة أردت تحقيقها بمثالية ألا وهى الحب! نقطة جعلتنى ذلك الشخص الكأيب الملول .. نقطة جعلتنى أخسر بعض أصدقائى وحينما استعدتهم استعدت كل شىء إلا الثقة وهو ما تسبب بالعديد من المشاكل " ولسه فى ايام منيله جاية! " ..

طوال تلك السنوات الخمسة الماضية أصبحت شخصا ً يكره الأجتماعيات وأنتقلت كل حياته إلى العالم الإفتراضى الذى هوا أصلا فيه يُحكم خصوصيته عليه ولا يسمح لهؤلاء المتطفلين راغبى الصداقات والتعرف أن يتعرفوا حتى عليه! حتى فى ذلك العالم الإفتراضى فشل طوال تلك السنوات الخمسة الماضية!

لم أعلم لماذا كان يخشى الأعتراف بفشل الخطة فشلا ً ذريعا ً .. لم يكن يعتاد الهروب بل كان دوما ً ينصح الأخرين بالمواجهه الان ومنذ شهر او كثر منذ ان علم ان الخطة فاشلة وهو يخشى الأعتراف بذلك .. أخبر نفسه انه لا يمتلك الوقت لكى يضع خطة بديلة!

عليه الان أن يفكر ويفكر ويفكر .. يجب ان يضع خطة جديدة .. خطة جديدة طويلة المدى .. عليه أن يتعامل مع الوضع الان .. ظل يهرب من الأوضاع الجديدة طوال العامين الماضيين خوفا ً من ان تفشل الخطة .. الأن هو يعترف بفشل الخطة .. والان عليه أن يبدأ بملاحظة الأشياء الجديدة من حوله .. عليه أن يبدأ فى حصر كل الأخطاء التى ادت إلى فشل الخطة القديمة ليبدأ بعدها فى وضع الخطة .. خطه حياته الجديدة!

لحظات! - القصقوصة الأتنين والعشرين

2011-05-17T21:57:00.002+02:00

Silhouette by Mohamed Rashed

اضاءه خافتة من ركن الغرفة البعيد مع موسيقى الجاز المنبثقة من ذلك المسجل العاتيق مع رائحة البخور، كل ذلك يُجبرك على ان تلتقط كاميرتك راغبا ً فى تصوير تلك اللحظة السريالية ولكن يدك تتوقف فى منتصف طريقها إلى الكاميرا! أنت تكره الكاميرا، نعم تكره تلك الأله التى تُسجل اللحظات .. تُسجل الذكريات! تضحك بصوت عالى متسائلا بينك وبين نفسك " بتكره الكاميرا عشان بتسجل الذكريات ؟! "هل انا جاد حقا ً فى كرهى للذكريات ؟! اللعنة، بل انا عاشق متيم للذكريات والماضى .. تمضى على ساعات طويلة فى كثير من الاحيان أقلب فى الصور القديمة فقط ولا شىء اخر .. تمر على لحظات كثيرة جدا ً كل ما افعله هو تذكر الماضى والذكريات .. وابتسم .. نعم ربما على الرغم من قسوة الماضى وقسوة الذكريات فأننا دوما نبتسم .. انا عاشق متيم للذكريات .. وفى كثير من الاحيان أعتبر نفسى اسير لتلك الذكريات بل ان شئنا الدقة أنا فى الأصل مجرد ذكرى فى عقل احدهم!

مهو اصله كان بيحب سارة وهيا أصلا مبتطيقوش :) - القصقوصة الواحد والعشرين

2011-05-15T11:24:00.000+02:00

تنويه : انا عارف انها ولا هتهز شعره عندك وانتى بتقريها، فياريت متقريهاش :) ، أحم أحب اقولكم ان ده لا يُعتبر شىء هيا جت كده من وحى لحظات جميلة النهاردة ومجموعة قصائد كانت بطلتها واحده أسمها سارة .. فكرتنى بحاجة كنت عاملة زمان!

مهو أصله كان بيحب سارة! اه والله كان بيحب سارة وفضل يحب ف سارة أيام وشهور وسنين وحبه ليها عمال يزيد وكان طول عمره نفس يعرف هيا ساره حسه بيه .. الحكاية والرواية انه فضل يحب سارة وهيا أصلا متعرفوش ..

وقال وعاد وعلى صوته ان حبه ليها مبيتمحيش وفضل صاحبنا يحب فى سارة بس هيا أصلا متعرفوش ..

وفاتت سنه وصاحبنا مشفش سارة وقال خلاص حبه ليها طلع على فشوش .. بس الصدفة تلعب تانى وصاحبنا يشوف سارة ويعرف أنه لسه بيحب سارة وحبه ليها مبيتمحيش ..

وينسى ازاى حبه ليها وهى اول واحده فيه .. ايوه فيه .. قلبه اللى شال فرح وحزن كتير .. ايوه هو نفس القلب اللى كان بيحقد ويحسد ويغضب ويشتم لسه فيه مكان نضيف .. مكان نضيف يحطه فيها ويقفل عليها فيه .. مش قولتلكم اصل الحكاية والرواية أنه لسه بيحب سارة بس هيا أصلا متعرفوش ..

فكر وقرر وبضحكه منها هو اصلا عارف انها مش ليه .. راح وقدم خطوه وياريته مقلهاش .. مش بقولكم أصل الحكاية والرواية ان سارة أصلا متعرفوش ..

مهو أصلا كان بيحب سارة وفضل يحب سارة وهيا أصلا متعرفوش والنهارده هوا عارف ان سارة مبتطقوش بس الحكاية والرواية انه أصلا حب سارة وهو عارف ان حبه ليها مبيتمحيش ..